Jervois租金拍住6星酒店

近年香港有唔少服務式住宅落成,為咗喺市場爭一席位,豪宅發展商樂聲電子(00213)特別搵嚟幫車路士班主阿布拉莫域設計俄羅斯大屋嘅猛人法籍設計大師Christian Liaigre親自操刀,設計上環蘇杭街89號The Jervois單位,有名師設計,租金自然有番咁上下,項目除咗月租外,亦有日租,面積700同1,550方呎單位日租要2,200元同4,200元,媲美六星級酒店。

劉Sir尋日去樂聲電子喺上環嘅The Jervois酒店式住宅,董事總經理李本智介紹項目單位設計特色及透露單位由Christian Liaigre操刀。

單位選料別出心裁

Christian係唔少國際富豪推崇嘅設計大師。李本智話,今次Christian為該項目設計嘅49個單位,靈感來自大自然,所以單位選用嘅材料具大自然氣息;好似用上有木紋嘅木板,單位內睡床亦特別用馬革訂製而成;至於浴室則全部採用雲石物料,為單位打造出既雅致又奢華感覺。

呢個項目每方呎租約57元,其中面積700方呎一房單位,月租4萬蚊起,1,550方呎兩房單位月租8.2萬元起;單位亦提供日租,分別約2,200元同4,200元,同城中六星級酒店差不多,若以該租金水平以月租計,呎租高達94元。

明春起兩項目落成

另外,樂聲電子嚟緊明年第一同第二季,仲有銅鑼灣威菲路道同上環永樂街兩個酒店式住宅落成,估計會再多約150個單位。

至於佢哋喺中環嘅50 Connaught Road Central,李本智強調暫時無出售物業嘅計劃,幢大廈現時租咗接近七成,最新中層單位呎租105元,複式單位租金就叫緊150元,佢話大家預期後市會冷淡,但市場仍然睇好亞洲區,所以唔係太擔心。

地產網大革新,即睇最新樓價走勢、最全面地產新聞及筍盤情報!

「Money18免費即秒股票報價網站」現推出8升級功能,財經資訊,實時實發!

劉sir

面積一千五百五十方呎的單位室內設計簡約,日租約四千二百元。

法籍設計師Christian Liaigre以木紋木材作牆身,令單位充滿大自然感覺。

樂聲電子李本智稱,The Jervois針對租住高級酒店客群。