股海實戰：中傳動承接力待觀察

歐盟峰會雖然最終達成協議，但未有即時「印鈔」措施出台，即係話叫大家繼續畫餅充飢。尋日港股隨外圍高開後，未能重上萬九點心理關口，午後滬綜指失守政策底2,300點，拖累港股反升為跌，收報18,575點，跌10點，成交僅444億元。

中央經濟工作會議尋日召開，此前定調嘅中共中央政治局會議上周五舉行，提出明年將實施積極嘅財政政策，保持穩健嘅貨幣政策，並會根據具體形勢對經濟進行微調，同時堅持內房調控不動搖，還將保證物價總水平穩定。基本上，中央嘅態度係「以不變應萬變」。建基於此，也別對周三工作會結論抱太大期望。

好淡陣營齊休息

尋日港股現貨成交僅444億元，而沽空額亦顯著回落至29.8億元，沽空比率僅6.7%，顯見無論好友抑或淡友，都翹埋雙手唔做嘢！兩地股海氣氛差成咁，海通證券（06837）選擇喺行業低潮集資，困難重重係必然，尋日更傳來上市計劃可能生變，咁睇落遲遲未有重啟上市計劃嘅光銀，未有趕搭尾班車，焉知非福！

個股方面，尋日風電股有異動，主要係聯合國喺過去兩周嘅南非氣候會議上達成協議，花旗為此發表報告，認為消息利好內地風電股，建議買入相關股份。

講開新能源股份，中電新能源（00735）上周五宣布取消按每股0.75元配售28億股新股予中國長江三峽集團嘅協議，但尋日又隨即宣布按每股0.65元向三峽集團配售32.3億股，集資金額同為21億元，似乎係因應市況調低了配售價，但最新每股作價仍較上周五有96.9%溢價，加上來頭唔細嘅三峽集團將成為公司單一最大股東，留意會否有大製作跟尾。

此外，從事包括製銷風電傳動齒輪設備產品嘅中傳動（00658），尋日亦曾升過上3.65元，後受市況回落拖累，收報3.47元，倒跌1.4%。中傳動現價往績PE唔到三倍，撇除特殊項目因素，中期純利雖同比倒退27%，但仍賺3.74億元人仔，搞到好似要蝕錢咁款，可見估值低迷。

走勢上，九月以來反彈一直受制於5.2元，但14日RSI現背馳，暫難言股價尋底之旅何時完結，惟短線亦不妨觀察板塊氣氛及該股喺低位嘅承接，向上較大阻力位喺3.7至3.8元水平，支持位喺3.18元。