市場徐想：豪特保健具內需概念
豪特保健（OTO）（06880）係保健產品開發商同零售商，產品組合龐大，包括消閒產品、健美產品、保健產品同診斷產品等等。根據市場調查公司弗若斯特沙利文報告，以銷售單位數量計，集團喺一○年香港嘅消閒設備市場排第一，市佔率65%，銷售成績相當唔錯；至於人體局部按摩裝置，市佔率更達72.2%。
公司嘅銷售渠道多元化，包括有傳統嘅銷售渠道（零售店、寄賣專櫃）、主動銷售渠道（展銷櫃台、公司銷售、國際銷售等等）。現時公司喺香港合共有14間零售店，16個寄賣專櫃；澳門有1間零售店，2個寄賣專櫃。值得留意嘅係，公司喺中國亦有14個寄賣專櫃，位於各個主要城市，例如北京、上海、深圳等等。咁睇起嚟，公司有唔錯嘅開發內需潛力。
公司擬發行8,000萬股，九成國際配售，一成公開發售，當中有15%超額配股權，招股價介乎1.28至1.6元，主要用作擴張內地業務。繼續追蹤、出發！