Fundman睇市：東風估值平易近人

市場等歐洲議息加上歐峰會結果，港股好似被點咗穴一樣，周四跌132點，收報19,107點，睇番上星期四裂口狂升過千點後，六個交易日指數高低位在19,242至18,818點之間，只有424點，按半杯水理論，好友可能認為急升後回吐壓力唔大，有利後市，但高位成交愈玩愈縮，淡友亦可以憧憬大市動力減弱，情況一如十一月初反彈到100日線之後無以為繼，掉頭跌落17,613點嗰次一樣。

今日九點半中國會公布十一月份CPI，綜合大行預期會由5.5%回到4.5%，相信滬綜指守唔守得住公認的「政策底」2,300點關口，數據會相當關鍵。如果通脹回落速度比市場預期快，中央會有更大的財政彈性，去繼續定點微調，包括春節前再減存款準備金率及增加一月份新增貸款額度。

港府係時候收招

自去年底政府推行SSD措施（額外印花稅），期內本港樓市成交額及交易宗數愈玩愈縮，由一○年下旬平均每月過萬宗成交，到近兩個月縮到得三、四千宗，回到○九年海嘯時水平。政府放風可能提早就SSD政策作出中期檢討，消息刺激美聯（01200）股價升0.35元，報4.25元，去番九月歐債危機前高位。其實，本地銀行水浸不再，紛紛收緊新做按揭條款，加上政府較早時間限制豪宅按揭成數及SSD發揮「抗炒」作用，炒家差不多絕迹市場，政府都係時候收招減少干預，短期而言，相信地產股未必及得上地產代理咁受惠於收招，消息落實前美聯應該可以睇高一線。

碧桂園（02007）公布上月售樓數據，期內銷售額25億元人民幣，按月及按年分別跌43%及29%，傳統十一月份並唔係內地樓市旺季，加上大環境按年跌兩成半經已屬「最低消費」，碧桂園股價未受影響，逆市升0.02元報3.02元。今年頭十一個月累積計，碧桂園總售樓金額394億元（人民幣．下同），換句話說，距離全年目標430億元仲差36億元，由已鎖定的合約銷售，問題應該唔大，反而限購令延期之後，淡風可能持續到明年初，捧場客要留意公司訂定來年銷售目標的高低。

內地18家主要乘用車生產商，十一月銷售量按年升4.1%，稍好過大行由持平到3%增長的預測，當中又以東風（00489）相對其他行家表現最標青，十一月乘用車銷售達13.48萬架，按年升14.3%，主要多得東風日產錄得34.2%按年增長，以及增加折扣所致。瑞銀估計，十一月優於預期的銷售數字，有利推動全年業績，估計明年東風本田有新型號推出，銷售會穩定回升。

眾多本地上市車股中，東風銷量及規模最大，可能亦因這個緣故，畀市場爆炸力較弱的感覺，故預期市盈率較華晨（01114）、長汽（02333）、吉利（00175）更平易近人。回顧海嘯後東風市盈率最高見過16.7倍，最低是今年十月的六倍，以全年每股盈利1.265元計，一一年預期市盈率8.1倍，較歷史平均10.9倍折讓兩成五，其實13港元樓下的東風吸引力唔錯，憧憬明年銷售表現繼續優於同業，有能力持有六至十二個月的，現價是頗值得收集持有。