股海實戰：盈德氣體吼位買貨

歐峰會結果及中國CPI公布前夕，市況繼續窄幅波動，恒指波幅僅181點，成交489億元。本周初，恒指牛仔街貨量仍遠高於熊仔，但到咗本周三，見恒指牛仔街貨下跌，牛、熊街貨去到相若嘅水平，究竟呢鋪被大戶放喺「砧板」上嘅係牛仔定熊仔，好快有答案！

內地房產價格下跌，加上明年經濟增長可能放慢，熱錢持續流出。但其實外資投入內地經濟實體嘅大趨勢未有因此而改變。今年以來，商務部批准多宗外資購併活動，近日雀巢收購糖果商徐福記亦獲得批准，顯見中國政策支持更多外資與民企嘅大型合作項目，藉以加快推動產業改革及提升行業營運水平。

海東青攻守兼備

講開又講，阿莊記得上月中旬海東青（02228）亦曾披露獲主要股東通知，有投資者擬投資主要股權，惟商討只處初步階段。海東青主要從事製銷工業應用嘅無紡布及化纖，一○年上市，招股價2.38元，現價3.75元，往績市盈率十倍，現價估值攻守兼備，向上升主要阻力喺4.2元，支持位喺3.55元。

周一阿莊話隻安碩A50（02823）落到10.8元會考慮落首注，尋日上晝十點幾確實穿過10.8元，但為時短暫，遂以平均價10.8元買入5萬個單位。另外上周四阿莊品評中國燃氣（00384）時，曾提到公司不難成為購併對象。尋日中燃及新奧能源（02688）均停牌，市場盛傳涉及購併活動，若然屬實，呢次真係開口中！

同樣從事公用供氣業務嘅盈德氣體（02168），自獲MSCI納入成中國指數成分股後，予人另眼相看之感。公司主要從事工業氣體供應，目前嘅大型項目包括神華喺內蒙包頭嘅煤炭化工項目，且尚有多份現場供氣合約，客戶來自鋼鐵、化工及有色金屬業。雖然內地經濟增長可能放慢，或會影響現有客戶用氣需求，但在政策傾斜下，相信集團業務前景仍然樂觀。

走勢方面，盈德氣體下半年股價多次升至接近8.7元便止步回頭，若然短期仍未能突破此位，則技術上仍處於7.3至8.6元嘅波幅區內，可待考驗50日線7.7至7.8元支持，再作部署。