過年免丟空靚盤劈租

聖誕將至，加上今年農曆新年喺一月底，令踏入十二月份已進入傳統租務淡季，由於唔少業主都唔希望將單位丟空過年，所以寧願平平地租出單位。一個曾經接連買入西南九龍帝峯．皇殿、瓏璽等多個新盤單位嘅投資客，最近將其中一個帝峯．皇殿高層優質海景靚單位大幅減租1萬元，以月租只係4萬元租出，低市價至少兩成。

有代理好友同劉Sir爆料，有個早年喺東涌炒開樓嘅投資者，近年已轉戰新盤市場，特別喺好多九龍市區豪宅新盤都見到佢嘅蹤影，上年更出手連掃3個帝峯．皇殿靚單位，收樓後一路將單位放盤出租，或以天價放售。

不過，由於近幾個月市況唔多好，所以單位遲遲未獲承接，可能個投資者見將單位繼續丟空都唔係辦法，所以決定減租先出租一個單位。啱啱租咗嘅帝峯．皇殿3座高層戶，屬海景靚貨，望到灣仔會展，面積近1,500方呎，原先叫租約5萬元，日前就減到約4萬元租出，呎租僅27元。

盛薈低市價12%租出

有地產代理話，其實帝峯．皇殿嘅租務市場都幾活躍，之前有個別單位呎租曾逾40元，而上述同類單位呎租，其實可以超過35元水平，所以今次個單位租金低市價逾20%，而該名投資者依家仲揸住2個同屋苑單位，包括一個特色戶。

事實上，唔少今年入伙嘅住宅新盤，由於業主未肯平賣，寧願將單位轉售為租，搞到租金表現麻麻，有代理講，剛入伙嘅大圍盛薈近日租盤大增，租金因而受壓，好似有個3座南翼中層單位，面積大約900方呎，由於租客可以一次過畀晒成年租金，所以業主亦特別爽快，以月租約1.4萬元租出單位，計落呎租僅約15.5元，低同類單位市價逾12%，呎租係屋苑新低。

外區客1.7萬承租峻弦

世紀21富山馮靜宜話，東九龍峻弦3座高層山景E室，業主為咗喺過年前租出單位，決定減租約2,000元，即吸引外區租客承租，月租僅約1.7萬元，呎租約17.5元。