Fundman睇市：馬鋼博反彈水位充足

美國失掉AAA信貸評級剛好四個月，四個月前大家以為世界末日，今日睇番轉頭，道指由10,809點升到周二晚的12,150點，累升12.4%；反映美元強弱的美匯指數，由74.7升至78.5，升幅5.1%，如果將升幅變成一年回報，等於37.2%及15.3%，美股強到咁，相信四個月前，講都無人信，證明有時集體共識未必會成事實。

標普將歐元區15個國家主權信用評級展望，列入負面觀察名單，有過上次中伏經驗，似乎股市今次選擇唔再信評級機構的指揮棒，歐美期貨昨日繼續揚升，市場押注本周歐洲領袖峰會，會將歐洲穩定機制（ESM）及歐洲金融穩定機制（EFSF）合併，使歐央行救市實力倍升。是否幻想美麗現實殘酷？惟有等下回分解，不過執筆時意大利十年國債孳息落到5.8厘，較上月底高位7.3厘，回落超過兩成，已經返到十月中水平，意大利三個月銀行拆息，由十月底的1.41厘回到1.25厘半年低位，流動性緊絀情況的確有紓緩迹象，由美國降級後股匯齊升，反映只要市場信心所向，評級公司點講都可以好少理，最緊要仲係反覆到暈的德法意幾國首腦，未來兩日係咪可以一條心坐低解決問題。

內房股繼續冇運行

十一月內房股銷售數字陸續出籠，並無奇迹出現，截至四號的一周，全國14個主要城市，住宅銷售共191.6萬平方米，按周升2%，按年則大跌四成，令年初至今累積銷售數字跌幅擴大到17%。近日官方放風，年底屆滿的限購令會無限延長直到另行通告為止，相信會令更多以為捱過今年有救的炒家死心。近期不少大行開始重估明年內地樓市價量的跌幅預測，瑞信及巴克萊預測明年樓價跌兩成，部分更淡到估跌三成，但不少內房股股價在○九年見頂進入漫長調整，近期反而有跌唔落的情況，不過目前要睇嘅，仲係中央要樓價跌幾深至會考慮適度鬆手，但基於樓價才剛轉向，睇怕都唔會係明年上半年咁快嘅事。

中央放水，幾個缺水板塊輪住炒，尋日連航運股也在瑞銀品題下急升，史提芬第一時間諗起鋼鐵股，睇怕遲早輪到。要捧鋼鐵股最大的心理包袱，係行業周期性明顯，盈利起伏大，以心水馬鋼（00323）為例，過去十年，業績最低及最高分別係○一年嘅1.52億及○四年嘅35.9億元（人民幣．下同），相差22.6倍，今年上半年因為鐵礦石價格高企及燃料成本上漲，毛利下滑，盈利大跌六成九，賺3.25億，大行上月見過管理層，第四季仍然麻麻，收復失地，惟有等明年。

睇番馬鋼○七及○九年高位，市帳率分別去到2.16倍及1.56倍，衰到貼地的○八年得0.21倍。今年十月份見過0.32倍，現價2.42港元，加上估計年底每股帳面值3.57元人民幣，約0.54倍，或者看官認為錯過十月超低價，有追寶尾之嫌，但要留意○八至○九年一役，馬鋼市帳率由0.21倍升至1.56倍，同樣是受惠中央放水減存款準備金率，即使今趟無四萬億救市，但假如能去到上次估值升幅中位數，經已講緊0.88倍，即約3.8港元，有充足值博空間。