股海實戰：德昌值得逢低吸納

歐洲可能讓歐洲穩定機制（ESM）與歐洲金融穩定基金（EFSF）同時運作，實行雙劍合璧救市，市場反應正面。恒指尋日高開逾百點，並以接近全日高位收市，成交回升至518億元。阿莊尋日話，後市走向A股走勢影響關鍵，見尋日滬綜指企穩喺2,300點樓上，市況略為喘定，睇埋內地CPI數據同歐盟峰會結果，後市方向將逐步明朗。

尋日有大行唱好嘅航運及港口股，午後股價全線走高，中海集運（02866）及中國遠洋（01919）均升逾一成，中海發展（01138）升6.9%。不過，環球經濟展望未明，航運股基本因素仍陰霾濃罩，憑甚麼睇好航運股，阿莊亦覺疑問，故認為落場小注短炒尚可，未到長揸時候。

重磅股醞釀黃金交叉

值得一提嘅係，技術上，包括大笨象（00005）以及一眾內銀及內險股，目前10日線正嘗試重上20日線，即醞釀所謂嘅「黃金交叉」利好訊號。究竟呢個技術指標今次準唔準，當然仲要視乎外圍消息是否配合，阿莊一向唔太睇重技術分析，但亦唔會完全否定，就當多一個參考指標。

專做汽車及工商用動力系統嘅德昌電機（00179），尋日交投活躍，收市報4.33元，升5.1%，成交3,912萬元。上月下旬公司宣布截至九月底止中期業績，營業額同比增長8%至11.18億美元，純利創紀錄，達1.02億美元，同比增長9%，毛利率較上年度下半年上升0.8個百分點至27.2%，整體表現算係有交代。

八月初以來，公司積極回購股份，大股東亦不斷入場增持，作價介乎3.7至4.4元，反映對前景信心十足。畢竟，德昌七成多收入來自海外市場，喺歐、美經濟不明朗下，業務存在一定風險，但呢份中績應有助穩住投資者信心，加上如今歐洲各國正積極解決債務問題，只要局面持續穩定下來，以過去德昌應付海外市場波動嘅成功經驗來看，對其業務展望唔使太過悲觀。

簡單講，其現價預測市盈率約十倍，以其於業內嘅龍頭地位，以及良好嘅公司管治，估值唔係昂貴。若然來年全球經濟真係差強人意，揸咩股票都冇運行，咁就無話可說；但若然外圍情況持續回穩，則呢隻優質工業股估值回升至相等於預測市盈率十二至十三倍，唔係過分。每逢股價回落至4元邊，又係落場嘅好機會。