樓市出更：北水回流瞄準工商舖

上個星期內地突然調低存款準備金率，預計北水陸續湧港，聽地產代理講，剛過去一周，內地投資者查詢及預約睇工商舖物業嘅比例，比之前一周已有所上升。好似日前就有兩組內地投資者，同時查詢金鐘海富中心一個每方呎叫價達1.7萬元嘅單位；而另一個月前已暫停睇樓嘅內地投資者，最近亦重投市場，喺火炭區搵緊工廈，諗住農曆新年之前用近2,000萬元入市。

人行上星期突然宣布調低存款準備金率0.5個百分點，變相向銀行體系注資達4,000億元人民幣，部分內地投資者睇準本港商用物業現時唔少收租回報有約3至5厘，所以趁勢物色入市機會。

內資睇工廈增至8%

好似上述海富中心1座中層單位，面積約1,500方呎，近日先後有兩組內地投資者透過代理查詢，主要係問物業成交期同該廈新近買賣情況，目前業主意向價約2,600萬元，呎價約1.7萬元。

美聯工商高級營業經理黎紹賢話，响剛過去一周，預約睇工廈嘅客源中，內地客由之前只佔約3%，回升到約8%。

重磅客火炭區覓貨

好似一個活躍於新界工廈市場嘅內地買家，佢之前見自己揸住約4、5個工廈單位，市值約4,000萬元，為免揸重貨，早前已經暫停入市。

不過，最近該揸重磅貨的內地買家獲悉內地放水，就再出動睇樓，計劃農曆新年前用近2,000萬元入市，且先後參觀火炭華樂工業中心E座中層一個1,900方呎單位，同埋中建電訊大廈中層戶，兩個單位業主意向價各400萬及1,000萬元。

由於不少內地旅客取道新界北來港，所以對該區嘅舖市都有一定認識，有地產代理講，有個嚟自廣東嘅投資者，依家正積極查詢上水新豐路雙號地下部分，面積約1,000方呎，業主意向價約1,500萬元。