Fundman睇市：太保估值吸引可收集

前晚評級機構標準普爾，在美股收市後，將17個歐元區國家中的15個國家主權信用評級展望，列入負面觀察名單，簡言之，是逼歐洲央行盡快拋出更多解救歐元區信貸危機的措施，並為成員國財政預算制訂更高的統一標準，否則評級中線有被下調的可能，按過往記錄，被列入前景展望負面觀察名單的國家，往後三個月被降級的風險高達50%！

諷刺地，歐債危機未有徹底解決迹象，今次環球金融風暴的起點美國，經濟卻似逐漸走出谷底，上星期公布的上月失業率數據，由9%回落至8.6%，道指今年累積升幅4.4%，遠遠跑贏累積下跌15.3%的歐洲股市，美元也相對強勢，美匯指數由十月中的75水平樓下，逐步攀升至79水平，作勢挑戰下半年的79.8雙頂阻力，假如以一班學生去形容歐美多國，雖然美國的財政操行只係攞到C，但市場認為對比攞D的歐洲，美國已經算係乖學生。

成功回補上升裂口

歐洲被列入負面展望的消息，港股借勢消化上星期裂口勁升過千點的超買，恒指跌237點，報18,942點，即市低位18,818點，算係回補咗上星期四大升市留低的18,192至18,868點裂口，即月期指尾市愈挾愈有，以接近全日高位收19,024點報收，走勢相當唔錯，但睇見現貨總成交縮到得番475億元，唔夠上星期四大升市一半，期指大戶想要高水定低水，應該難度唔大。

講到底，今次升市會唔會好似十一月初，再戰100日線（現時在19,504點），未來幾日成交會否回升配合，甚為關鍵，可惜係基金線消息麻麻，幾隻重量級新股傳有「抽飛」情況，當中不乏大牌子好似索羅斯基金等，部分中小型證券行怕客仔「認大咗」，降低孖展成數去到七至八成，似乎主要針對聲勢無咁響的新華保險（01336），查實仲有十幾個交易日就同二○一一年講拜拜，基金想追番失地，睇怕都無法急於一時。

講開內險股，過往市場將A股與內險股投資收益掛鈎，使內險股走勢同A股甚為同步，但見滬綜指昨日最低去到2,310點，差3點就改寫兩年半新低位，內險股儘管通通向下，可是股價同十及十一月份的低位比較，卻有一浪高於一浪之勢，尤其中國保監最近加強監管，實施《保險公司次級定期債務管理辦法》，保險公司發行次級債佔淨資產比率降低五成，鼓勵保險公司爭取本身資本增長，市場普遍視為是短期利淡內險股走勢的訊號，但股價卻與分析員的向淡睇法背道而馳，可能與保險股溢價已大幅由高位回落有關。

保單收入增長理想

以太保（02601）為例，現價23.3元，市值2,025億港元，市場估計一二年純利126.6億元人民幣，伸算市盈率12.7倍，和上市初期25至30倍相比，已明顯親民得多。何況這全國第三大、新保單收入增長理想的保險股，未來兩年預期增長仍達18至25%，對比於低雙位數的估值，對一直想買保險股卻被高估值嚇退的中長線投資者來說，看來是時候考慮分段收集。