股海實戰：博反彈可免則免

前晚美股收市後，標普將歐元區十五國主權評級納入負面觀察名單，消息震散亞太區股市，港股開市不久即失守萬九點關，加上A股走勢差強人意，人仔又連日貶值，中資股由熱轉冷，結果恒指跌穿萬九點收市，成交僅475億元。

早前奧巴馬喺歐洲與胡主席碰頭，多番敦促人仔升值，點知被當面婉拒，如今人仔更掉頭貶值。事實上，內地股市持續低迷、內房調控持續，中國嘅投資機會減少，加上明年出口前景不容樂觀，觸發熱錢流出；反觀美國，為咗刺激經濟，續有減稅等惠商措施出台，吸引資金回流。可見是環球資金流動轉變，促使人仔貶值，不存在「操控」問題。不過，阿莊認為，中國嘅貨幣政策既已有「微調」，暫毋須過分憂慮人仔會大幅貶值，只係要有心理準備，因應實體經濟情況變化，短期人仔匯率波幅會持續擴大。

A股走勢影響關鍵

回說尋日市況，內銀及內險股普遍低收，近年一直受惠人仔升值嘅航空股頓失王牌，股價受壓，東航（00670）跌5%，國航（00753）及南航（01055）分別跌1.9及3.7%。此外，太陽能板塊沽壓大，保利協鑫（03800）跌4.9%，沽空比率32%；卡姆丹克（00712）亦跌逾4%，上月底以來嘅反攻經已完結，喺產業前景未見明顯改善之下，博反彈可免則免。至於A股走勢，究竟短期滬綜指會破底而下，抑或穩守2,300點觸發反彈，呢幾個交易日嘅表現成關鍵。

大戶屠牛機會存在

港股方面，牛熊證及窩輪成交佔大市比率連續兩日企喺40%樓上。截至本周一，恒指牛證收回價介乎17,200至17,999點嘅街貨量達17億份，反觀恒指熊證收回價介乎19,200至19,999點嘅街貨量只有9億份，故大戶部署屠「牛」嘅可能性亦不能抹殺。

股海醞釀大風大浪，想搵穩陣股票避風頭，本來領匯（00823）都係其中一個選擇，貪其專做公屋商場，租金收益相對穩定，現價息率有4.4厘。之不過，近期股價走勢欠佳，本月初10日線跌穿20日線，走勢轉弱，現正考驗50日線26.8元承接，一旦跌穿該位，宜待14日RSI回落至略穿30嘅超賣水平才分注入場。