遍地筍租盤豪宅抵住

近年樓按息率低企，唔少投資者選擇買磚頭抗通脹，加上最近市況轉靜，業主唔願平價出貨，令到多個今年新入伙新盤租盤充裕，而臨近年尾，亦寧願平平地盡快租出單位，所以最近多個新盤出現低租成交。

好似鴨脷洲南灣，呎租終於失守20元，同入伙多年嘅大型屋苑呎租差唔多，由於屋苑係新地（00016）等發展，加上會所設施齊備，所以當價位去到咁低，即時刺激租務交投急升，今個月到依家短短幾日已有約莫10宗租務成交。

南灣數日十宗租務

唔少南灣嘅業主都希望趁年底之前可以租出單位，所以最近市場都出現筍價租盤，劉Sir聽中原黃廷傑講，好似屋苑8座中低層B室，面積1,315方呎，近期以月租2.5萬元租出，呎租僅19元，個單位望遊艇景，不過同時都望到船廠景，所以租金相對吸引；其後另一個8座低層B室亦以月租2.6萬元租出，呎租亦只係19.8元。

他又話，由於南灣屋苑配套同單位質素不俗，所以當租金跌到現水平，即時刺激租務交投表現活躍，上月全個屋苑錄得接近30宗租務成交，個別大單位呎租約莫40元，而今個月到依家就已經有約10宗租務成交。

除咗南灣之外，西南九龍帝峯．皇殿都出現筍價租盤，有代理爆料，一個早年喺東涌發迹嘅投資者，近年已轉戰新盤市場，仲連掃各區多個豪宅新盤，當中包括幾個帝峯．皇殿海景靚單位，隨住項目已經收樓，個投資者亦考慮以低市價嘅月租，租出其中一個極高層煙花海景戶。

帝峯減租15%未算低

據了解，個單位面積逾1,400方呎，擁維港煙花海景，傳聞正獲租客以每月約3.8萬至4萬元洽租，如果真係成事嘅話，呎租可以低至約25元。

帝峯．皇殿過往最貴呎租曾經高逾40元，而個盤最近亦有其他單位減租，其中一個6座中低層面積約1,005方呎單位，月租減逾15%至2.95萬元租出，呎租約29.4元。