股海實戰：金隅估值可望上調

七大央行聯手做嘢，顯示各國政府齊心為經濟「抗寒」，有望令這個聖誕新年魚缸不太冷。港股上周四急升逾千點後，翌日出現回吐，恒指最多只跌162點，之後喺18,900點水平徘徊，炒家見大市跌唔落，尾市掉頭追貨，指數最多倒升149點，收報19,040點，升38點，成交縮減至649億元，沽空比率8.7%。

兩隻恒指新貴康師傅（00322）同旺旺（00151）今日開始納入恒指成分股，上周五大部分時間表現偏軟，至收市前十分鐘始見指數基金買盤掃貨，康師傅倒升2%，收報25.4元，成交14.6億元，沽空比率急升至53.6%；旺旺收報7.95元，升0.51%，成交15.12億元，沽空比率41.7%，唔排除月內股價會有回吐壓力。

宜採逢低增持策略

內地四大銀行十一月新增貸款遜預期，此乃人行出招前A股不振嘅原因之一。如今政策已有改變，阿莊認為可因應轉變逢低增持股票，待明年初內銀新增貸款復常，魚缸自然會「春回大地」﹗

股份方面，上周阿莊話會等A50中國基金（02823）回吐，至10.8元或樓下落第一注，上周五最低只見過10.9元，收報11.04元，跌1.4%，本周會繼續留意入市機會。

睇好A股表現，若果唔想為選股煩惱嘅，可以從A50入手。但若然對中資股重現升浪信心十足，且又能承擔較大風險，則不妨從內房及建材股入手。金隅（02009）主要從事水泥、新型建材、房地產開發以及物業投資和管理業務，受到內房調控政策嘅拖累，股價由今年高位回落累計跌幅近65%。

不過，觀其業績表現，截至今年六月底止中期純利16.35億元（人民幣．下同），同比增長54%；而截至今年九月底止首九個月，按中國會計制度計之純利為23.49億元，而單計第三季純利則為7.13億元，咁睇落，全年度業績可望按年錄得不俗嘅增長。更何況如今人行下調RRR，意味市場流動性緊絀嘅情況將獲得改善，利好內房氣氛，金隅嘅估值應有上調空間。

走勢方面，上周喺5.72至5.9元（港元．下同）有一上升裂口位，短線回吐回補此裂口亦不足奇，屆時可趁低吸納，放中線目標重上7元關，支持位喺5.4元。