樓市出更：工商舖炒家快閃驚坐艇

歐債問題時好時壞，加埋銀行閂水喉，好多早前諗住短炒一轉嘅炒家搵客接貨難度大增，搞到大失預算，唔少都選擇劈價吸客，賺少少「薄cut」離場，劉Sir粗略估計，依家工商舖摸貨賺幅數埋只係有大約8至10%左右，比起今年上半年好景嘅時候，差不多縮水一半有多。有舖界「神奇小子」之稱嘅黃海明話，依家出貨真係難好多，所以奉勸各位買貨時要審慎，以免坐艇，短炒變長揸。

樓市承接力同經濟表現關係密切，好似喺今年上半年，個市熱烘烘，差唔多買乜都賺，轉手即賺錢個案通街都係，賺幅可以去到兩至三成，好似張姓投資者今年四月期間摸出嘅油麻地彌敦道383號地下其中一個地舖，涉資大約2,000萬元左右，揸咗五個月帳面賺約550萬元，獲利幅度超過33%。

力寶摸出賺唔夠5%

不過，時移世易，自從今年中起，歐、美經濟負面消息一個爆完又一個，成交愈來愈少，加上銀行又閂水喉，就算買家有心接貨，上會都唔容易，投資者為求盡早甩貨，惟有減價吸客，「薄cut」離場。其中投資者黎汝遠早前摸出金鐘力寶中心1座中層戶，面積8,000多方呎，成交價大約1.37億元，持貨大約十一個月，帳面只賺約517萬元，賺幅半成都唔夠。

投資者急掟利寶時

另外，觀塘利寶時中心低層戶，面積大約1,600方呎，原業主上個月斥近570萬元購入，放咗半個月就「急急腳」以600萬元摸出，帳面賺30萬元即撇，賺幅計落只係半成多少少。

資深投資者黃海明同劉Sir講，愈近年尾收爐，銀行承做物業按揭嘅積極性大減，唔少有興趣趁低撈底入市買家都大失預算，所以部分摸貨放售工商舖物業業主，惟有將原先嘅叫價減少少，趁成交期前離場。綜觀目前工商舖邊際利潤已經降至5至8%左右，同今年上半年嘅約10至20%，明顯少一大截。