Fundman睇市：波司登買定等收成

尋日，十一月基金月結日，今年無論傳統長倉基金，抑或係可沽可買的對沖基金，已經無幾多個對全年業績表現存有太大幻想，不過，MSCI指數成分股大執位，仍然迫使唔少指數基金及ETF需要「照單執藥」，刺激昨日港股交投升至780億元，是十一月份第二最高紀錄，可惜受制於今日中國PMI極可能跌穿50，即係由擴張步入收縮的陰霾下，指數昨日又再跌穿萬八關口，收報17,989點，跌266點。

整個十一月份計，恒指跌1,875點，八月至今，按月計恒指八月跌1,906點、九月跌2,942點，十月反彈2,242點，平均每月上落都超過2,200點，經歷了「唔係大生，就係大死」的四個月。

十二月，因聖誕及除夕假期關係，傳統上較淡靜，理論上股民可以趁機抖抖，但見前晚歐盟財長會議就拯救歐債危機，仲停留在紙上談兵階段，歐洲普遍債息企在近期高位，未肯回落，充分反映債商對救市措施信心麻麻，只怕今個月大市仲係口淡淡機會比較大。

巨型IPO佗累B股

尋日滬綜指跌3.3%，上海B股好似執笠一樣，跌6.1%，指數創今年新低，事緣市傳今日公布嘅中國十一月份PMI，可能跌至47.5水平（大行估只係由50.4跌落49.8），係真係假都好，今日早上九點就會「開古」。尋日傍晚央行宣布減存款準備金率，歐債危機對中國經濟的衝擊，有山雨欲來之勢，另外，B股跌得咁兇殘，同近期幾隻巨型IPO令游資更形緊絀，不無關係。

業績股繼續榮辱互見，昨日輪到變身成功的波司登（03998），前晚公布今年中期純利按年急增近兩倍至3.27億元（人民幣．下同），期內收入亦按年上升47.4%至27.39億元。業績理想，帶動股價逆市升逾3%。

若細心睇份業績，其實波司登早前採取四季化服裝的策略已初見成效，並逐步由一隻純羽絨股轉型至服裝股。雖然中報期內為內地羽絨銷售淡季，但集團成功清理上年度的存貨，令期內羽絨業務銷售按年仍增長46.8%至17.75億元。

與此同時，藉着早前強攻內地男裝市場、收購女裝品牌JESSIE及進軍兒童用品市場，令集團上半年非羽絨業務的收入較去年同期激增1.48倍至3.37億元，分部收入佔比亦由7.29%升至12.29%。

全年業績值得憧憬

除了轉型成功，似乎多個客觀因素都幫了波司登一把，有指在拉尼娜現象影響下，今年內地或會遇上千年一凍，對於去年旗下四個羽絨品牌共佔內地羽絨總銷售36.7%的波司登相當有利。另外，內需銷情例旺的春節，今年較往年來得早，而三月結的波司登，全年業績令人期待。

集團一向派息慷慨，中期息每股派3.8分，派息比率高達九成，預測息率亦有逾10厘，加上業績維持高增長，以其往績市盈率約十倍計，現價並唔算貴，若股價回試2至2.1元區間，不妨作中線部署，迎接明年的收成期。