股海實戰：中燃不妨小注短炒

尋日市場傳出上海國際板即將推出，引發B股急挫，加上投資者憂慮PMI數字欠佳，致使A股大跌，滬綜指跌3.27%，深成指更創十六個月新低，真係風聲鶴唳。正當股海一片愁雲慘霧，阿爺當機立斷，執筆時傳來人行宣布下調RRR，終於肯「放水」，一方面顯示經濟數據可能真係幾差，官方要先下手為強平衡市場風險；二來則顯示市場流動性趨緊嘅情況已開始逆轉，為臘月兩地股市表現重燃一點希望！

電力股終獲打救

受A股拖累，尋日恒指失守萬八點關，收報17,989點，跌266點，但尋日期指尾段突然高水92點收市，係咪有春江鴨收到風阿爺放水，不得而知，暫看恒指波幅仍介乎17,800至18,500點水平，能否藉利好消息向上突破18,500點阻力位，就要視乎本月初召開嘅中央經濟工作會議，會否發出更多穩定市場信心嘅訊息。

電力股長期蝕錢愧對股東，喺通脹壓力紓緩之下，阿爺終於出手打救。發改委尋日宣布，從今日起調升非居民嘅銷售電價及電企上網電價，並限制電煤價格，以減輕電企嘅成本壓力。由於基本因素改善，料有助改善電力股股價表現；反而，電煤價格被施以緊箍咒，煤炭股收益勢受影響，難怪喺銷售旺季來臨前股價卻顯著受壓。

又講番業績股，中國燃氣（00384）截至今年九月底止半年收入79.12億元，同比增長21%；純利3.73億元，同比增幅三倍至3.73億元。期內管道燃氣銷售及煤氣接駁業務收益錄得較大增長，液化石油銷售業務亦轉虧為盈。

查實公司所屬嘅行業產業前景樂觀，只係早前受有關主要股東嘅負面消息影響，阿莊亦幾擔心呢隻股點收科，但自復牌以來，股價逐步回穩，今時今日仲好哋哋，睇怕背後鬥爭已分出高下。如今睇其中期業績對辦，喺業務持續正常運作嘅大前提之下，相信股價走勢可持續獲得改善。而事實上，以中燃目前嘅業務類別以及營運規模，應該唔難吸引行業龍頭視為購併對象。

但阿莊都係不忘補充一句，畢竟呢隻係民企股，股價須負上一定嘅風險溢價，炒作只宜小注，暫看短期股價波幅介乎2.5至3元。