樓市出更:信德業主加招賣得出有獎

工商舖由於唔受額外印花稅措施影響,所以今年勢頭幾好,但嚟到年尾,由於銀行按揭閂水喉,搞到市況出現牛皮,有部分投資者近期已經自行出招,好似增加代理佣金或提供較長成交期以圖突圍出貨,上環信德中心西翼有個中層戶嘅業主除咗加佣到1.5%外,亦提供額外獎金,而火炭更加有業主三管齊下,以加佣、減價同提供延長成交期搶客。

資深投資者黎汝遠同劉Sir講,樓市整體買賣氣氛薄弱,個別新盤以高佣金鼓勵代理促銷,咁嘅情況下,工商舖二手業主以加佣同獎金鼓勵代理促銷,亦係無可厚非,相信呢個情況會延續到明年農曆新年期間。

高佣金促銷料到明春

而佢旗下嘅灣仔北海中心高層一個全層單位,現時開價每方呎約1萬元放售,涉資約7,110多萬元,若果代理成功協助售出單位,佣金可達2%。由於唔少業主希望年底前出貨,所以除咗加佣外,大家都各出奇謀,好似信德中心西翼有個中層戶,面積約2,500方呎,業主叫價每方呎約2萬元,涉資約5,000萬元,如果成功賣出,不單代理佣金可以加到1.5%,而且仲提供獎金獎賞。

火炭工廈半年成交期

至於火炭威力工業中心高層戶亦有業主為求吸客,不惜招數盡出,業主月前開價每方呎約2,700元放盤,最近除咗將佣金由1%加到2%外,亦將成交期由市場一般約兩個月,延長至六個月,到日前為止更每方呎減價100元吸客。

舖位方面,一線零售區舖位業主現時仲撐得住,但二、三線區就有舖位投資者高佣出貨,聽地產代理講,觀塘康寧道一個雙號面積約500方呎地舖,業主維持開價約1,850萬元放售,而促成交易佣金就高達3%。

地產網大革新,即睇最新樓價走勢、最全面地產新聞及筍盤情報!

「Money18免費即秒股票報價網站」現推出8升級功能,財經資訊,實時實發!

劉sir

上環信德中心西翼一中層戶業主積極出招,鼓勵代理促銷。