牛熊對壘：騰訊短線博反彈揀14848

昨日期指結算，市場炒作歐洲救市穩定基金落實細節，外圍做好令港股乘勢再挾淡倉，恒指高開後，升幅一度收窄，午後發力飆高，主板成交增至550億元，資金追捧個別消息板塊。

從過去經驗，大市挾高，結算後指數便會打回原形，但近期新股趕搭「尾班車」，股場中人估班承銷團會一力護航，谷起氣氛以便上市順順利利，加埋年底基金要做粉飾工作，咁多人「齊心做事」，就算長線睇淡，短線都要走轉做好，十二月不宜睇淡，有機會走出月頭跌、月尾升的所謂「宿命」。

大市成交按日增逾三成，焦點明顯轉移正股身上，全日窩輪成交只增一成左右至80.55億元，佔主板成交比重降至14.64%，牛熊證的成交亦升約一成至79.69億元，比重為14.49%。當港股連續兩日被挾高，兩種產品佔大市比重由上周的四成急降至昨日的三成以下。

昨日被強制收回的牛熊證數目達15隻，牛熊比例幾乎各半，在芸芸被打靶的牛熊證之中，包括了4隻騰訊（00700）牛證，十大跌幅榜中亦見騰訊瑞信牛（68551）排於首位，單日跌幅逾五成，情況值得留意。

騰訊股價月來一直級級落，以月初高位188元計，至今累跌超過兩成，跑輸同期恒指表現，公司第三季業績遜預期，大行對其後向唔多睇好，近日更傳有基金要沽貨離場，咁多負面消息同時出現，股價唔跌就難。

不過，鐘擺理論之下，騰訊幾乎跌足一個月，幾弱的股票都要作個中場休息，昨日一度跌穿140元水平後迅即反彈，收市微升0.2%，相信140元有一定支持，短期反彈的機會較高，可考慮騰訊瑞銀購（14848），明年四月十七日到期，實際槓桿5.1倍，引伸波幅49%，行使價160.88元。