股海實戰：真明麗重拾升軌可期

前晚美股大幅反彈，恒指順勢抽至全日高位18,372點，收報18,256點，升218點，成交回升至551億元。不過，眼見仍朝朝落金魚缸搵食嘅散戶經已愈來愈少，喺銀行亦唔使再爭睇股票機，連證券行經紀枱頭電話成朝早都冇咩點響，真係大有歲晚收爐之感！

屈指一算，十二月大概有十隻新股要趕搭尾班車上市，其中新華人壽（01336）及周大福（01929）兩隻大型新股勢將成為市場焦點。之不過，依家魚缸交投偏靜，加上市底利淡，新股除非定價十分吸引，否則入得飛嘅都預咗要「守」。

尋日阿莊話旺旺（00151）上到7.8至8元會睇位食胡，坐言起行，尋日見隻股最高踢上7.99元，遂以均價7.95元沽出8萬股，獲利4.73萬元，夠買番份聖誕禮物！

LED產業露曙光

發改委宣布淘汰白熾燈路線圖，大致係明年起逐步禁止使用白熾燈，至一六年徹底淘汰普通照明用白熾燈。講到LED產業，呢幾年行業投資過熱，現時廠商都在水深火熱之中，傳來淘汰白熾燈時間表嘅利好消息，都算係一線曙光。

以專門做LED燈具嘅真明麗（01868）為例，截至九月底止中期營業額7.88億元，比對去年一至六月增長7.9%，但卻轉盈為虧，蝕1.04億元。期內公司毛利率由去年六月嘅33.1%下降至13.7%，主要係原材料及勞工成本上漲，加上人仔升值，而公司擴充廠房及設備亦令折舊費用大增，另呆滯存貨變賣錄得損失6,590萬元。

今年嘅逆境係全行業都要面對，慶幸展望明年，不單只中國，歐美各國亦會逐步淘汰白熾燈泡，並以LED產品取代，前景並不悲觀。當行業走出低潮，喺產銷上擁有規模效益嘅真明麗，當可率先重拾升軌。

其中期業績亦披露，九月份營業額有改善，且已成功透過美國Home Depot推出家用LED產品，相信下半年整體表現有改善空間。另市場盛傳年底前有關部門將落實為LED照明產品提供補貼，且看未來一個月會否報佳音。此外，尋日真明麗宣布，透過展開戰略合作，未來兩年將為中石化油站供應LED燈具，消息刺激股價急升10%，收報1.6元。隨着產業政策底定，相信類似嘅合作會陸續有來，1.5元樓下可以分注收集。