樓市出更：半山舊樓高價開拍變趕客

市況淡靜，近排政府地皮出售價大部分都比預期低，反映到發展商並唔太睇好後市，所以出價都較審慎，尋日劉SIR去咗一個私人拍賣會，佢哋拍賣市區半山摩羅廟街全幢舊樓，開價要3.5億元，以可重建樓面計，每方呎樓面地價一萬多元，都幾進取，不過喺依家市況就較難賣得出，所以最終幢物業無任何人承價而收回。

尋日拍賣嘅係半山摩羅廟街8、8A、10及10號A舊樓，委託第一太平戴維斯拍賣，都吸引唔少人到場，包括有各佔物業約一半業權嘅金朝陽（00878）同謝氏家族，而英皇國際（00163）亦有派員到場，拍賣官公布咗物業開價3.5億元後，每口叫價200萬元，過咗五分鐘都無人承價，最終被收回。

全幢開3.5億 貴過市價

英皇國際執行董事張炳強話，地皮位置「靚」，適合發展中小型住宅，但地盤規模細，裁剪彈性唔高，加上叫價高過市價，覺得貴，所以未有舉手。另外，蔡姓投資者亦指出價錢太高。根據資料顯示，該項目地盤面積約4,276方呎，地積比率八倍，可建樓面逾3.4萬方呎，以3.5億元開價計，每方呎樓價地價約一萬多元。

第一太平戴維斯估值及專業顧問董事總經理陳超國同劉Sir講，市場氣氛動盪，銀行息口上揚，政府近期亦積極推出發展中小型單位地皮，細單位供應大增，搞到買家對後市愈嚟愈審慎，加上鄰近地皮購併價值唔高，亦影響咗收購意欲。另外，多次翻叮嘅2個「的士招」中半山愛都大廈及薄扶林碧瑤灣共三個豪宅，昨再一次拍賣仍未獲承價被收回。

嘉都大廈獲批強拍

至於之前唔少舊樓重建強拍申請已陸續批出，可以話係到咗購併收成期。土審處尋日就批出咗何文田亞皆老街116號嘉都大廈嘅強拍申請，拍賣底價為6.66億元。申請財團喺舊年年底已經集齊咗約86.9%業權，而喺申請期間已進一步收購至超過99%，依家只差一個高層地庫嘅半份業權。

另一方面，有車位繼續平賣，荃灣朗逸峰一個車位以17萬元下周推出拍賣，開價比購入價低近兩成。