股海實戰：北控候低吸納睇中線

恒指上周失守萬八點關，就連十月中旬嘅低位亦不保，上周五大市成交更跌至只有397.6億元，就連牛熊證及窩輪成交均明顯減少，真係睇到頭擰擰！魚缸交投冷清，除咗因為外圍因素利淡之外，多隻大型新股即將展開招股活動，投資者要備留資金進行認購，亦對魚缸人氣造成影響。

不單港股交投淡靜，就連A股市場亦然，上周五滬、深主板總成交金額僅970億元人仔，且滬綜指及深成指一樣未能收復重要心理關口。據講國務院正着手整頓各類交易場所，炒家經已超級「水緊」，加埋政府全力推動金融市場規範化，打擊不法炒賣，難怪市場交投一沉不起。

無謂憧憬中央放水

究竟中央何時才會再開水掣，聽表叔講中央內部仍有分歧，但眼見歐、美經濟搞得一團糟，整體態度依然趨向審慎。一年一度嘅中央經濟工作會議即將召開，會為一二年嘅宏觀經濟政策定調，此前官方傳媒開始放風，大體係「預調微調」不等於「貨幣寬鬆」、「目前內地經濟狀況已不適合再實施寬鬆貨幣政策」等等。

顯然，股友都要接受現實，不能老是憧憬4萬億人仔刺激經濟方案會再來個翻版，反而要意識到，中國貨幣政策極度寬鬆嘅日子經已完結，而來年主要工作係力促調整經濟結構，政策目標只能繼續求「穩」，提升經濟發展質量比追求增長更形重要。

回說港股，上周五恒指10日線已跌穿50日線，已連續出現兩個死亡交叉，除非有重大利好消息出現，否則後市反彈力度有限。再睇截至上周四數據，恒指牛仔收回價介乎17,000至17,599點嘅街貨達12.5億份，話唔定班大戶真係要盡殲牛仔始罷休，呢個時候入市撈底唔值博，炒家倒不如提早出外度假或者SHOPPING辦年貨仲實際！

內銀、內房及保險股都唔使點睇，煤炭股喺煤炭銷售旺季前股價集體跳水。上周五多隻業績股，如JOYCE（00647）、創維（00751）、阿里巴巴（01688）股價均見光死，要搵實力股避險着實不易。

大紅籌北控（00392）逾半收入來自穩定嘅燃氣業務，盈利能見度高，令股價增添防守性。八月股市大跌以來，其表現跑贏大市，暫看主要承接區喺35至37元，阻力位喺42至43元。若然嚟緊股市繼續尋底，可待回落至38元樓下，或14日RSI回落至30水平，始作中線部署。