樓市出更：大款手緊唔買仲要掟

內地收緊銀根，來港買樓都要計過度過，儘管最近的確多咗班「末代」投資移民客夠期揀樓，不過樓市唔穩，「大款」佔成交比例始終都係冰山一角。唔少代理老友都同劉Sir講，近排班豪客買樓無以前咁「爽手」，好似一向都係內地客置業集中地嘅九龍站、奧運站同新界北區，內地買家佔整體成交比例已經由早排35至50%，跌到得番20至30%左右。

最近有扎根九龍站嘅代理老友同劉Sir大吐苦水，話呢兩、三個月班內地客大部分都「齋睇無幫襯」，100個睇樓嘅內地客，最終拍板入市嘅都唔知有無1、2個。

眾所周知，九龍站豪宅向來內地客比例佔成交達四至五成，一下子無咗呢班主力客源，交投想好都難，所以最近兩個月九龍站都係得十幾宗二手成交，內地客佔比例亦減到大約兩至三成。

奧運新界北 兩成內資

其實班內地客一向都係「大小通殺」，唔好以為得優質豪宅會受影響，好似提供中大型住宅嘅奧運站，同埋細價樓集中地嘅上水及粉嶺區，都有代理老友話內地客入市比例少咗好多。其中奧運站早前高峰期，內地客佔成交比例高達35%，最近只得20%以內，而新界北區內地客比例亦由40%，縮減至20至30%左右。

內地客沽貨比例高企

事實上，內地客來港買樓變得謹慎之餘，持貨心態都弱咗，所以最近「大款」掟貨絕不手軟，好似持有西南九龍帝峯．皇殿最少6伙嘅內地客，月前就劈價500萬元沽出其中1伙。

數據係唔會呃人，最近代理一份報告指出，從舊年第四季起，內地個人名義持有單位沽貨宗數以及金額，截至今年第三季，已經連續四個季度高企3%或以上，反映內地客對本港樓市信心有啲動搖。