市場徐想：周大福上市展鴻圖
大家都知彤叔眼光獨到，所以Prof. J都密切留意密鑼緊鼓上市嘅周大福珠寶（01929）。
周大福珠寶係大中華區入面最大嘅珠寶零售商，四月時喺同行間已傳聞，周大福早已搵定幾間大行幫手包銷，其中包括滙豐同高盛。估計集團集資額234億元以上，發行10.5億股，當中23.8%（2.5億股）係舊股，希望趕喺今年內上市，預期市盈率三十倍左右。
周大福歷史悠久，係香港著名品牌，集團亦係全球最大嘅鑽石毛胚供應商，同時係英國鑽石貿易公司（DTC）全世界78個特約配售商之一。公司喺南非約翰內斯堡設有兩間鑽石切割打磨廠，內地同香港亦有鑽石切割打磨工廠同珠寶首飾設計製造工廠，員工超過30,000人，每年首飾產量逾700萬件。
集團喺中、港、澳等地有1,100間分行左右。周大福呢次集資，當然志在四方啦！集團想增設分行，將加倍至2,000間，胃口唔細！一於繼續追蹤、出發！