Fundman睇市：海螺重新起步博得過

德國畀一班窮兄弟拖累，前晚拍賣60億歐元十年期國債，市場反應未如理想，中標利率1.98厘，債市似乎唔單止要懲罰「歐豬」壞學生，連經濟唔差的好學生德國都一齊要受罰，其十年期債息率抽上2.09厘的三星期高位，竟然高過美國十年期債息率1.88厘近一成一，市場反應話畀默克爾夫人知，要救歐豬同埋救自己，似乎只係剩番共同發債及印銀紙呢一個方向。

早兩日筆者先話道指今年三次收市跌穿50日平均線，緊隨其後的一至三星期出現介乎592至1,730點的跌幅。周二道指確認跌穿50日線收市，周三已出現236點的急跌，收11,257點，對好友而言，可以百分百肯定尋晚美股唔會再跌（因為感恩節假期），走先美股一日的港股，昨日好友借機會反攻，恒指由最多跌207點變倒升70點收市，報17,935點。

下星期二期指結算，十一月份港股由頭跌到尾，睇番整個月期指最高成交頻率係19,100點，超過16萬張期指在該水平上下50點之內成交，美股今晚得半日市，估計好友會盡量想辦法輸少當贏，上番19,100點機會近乎零，但上番18,200至18,500點之間，機會未可抹殺。

現價只及高位一半

近期港股持續向淡，多個早前的強勢板塊早已淪為弱勢，過往深受市場歡迎的水泥股，股價自下半年開始亦如山泥傾瀉般跌不停。

龍頭股安徽海螺（00914）於十月更試過創下17.9元的一年低位，雖然其後略為反彈，但與七月高位41元相比，現價仍跌近一半，但隨着市場憧憬內地短線或有微調政策支持，以及保障房及基建長期發展的大方向不變，海螺作為業內龍頭應能受惠，中長線具有一定的投資價值。

回顧第三季，海螺收入按年上升近五成，至126.47億元（人民幣．下同）；純利30.61億元，飆升1.24倍。期內，綜合毛利率由去年同期的約三成升至四成。第三季業績維持理想增長，主要受到市場對水泥需求及價格上升的帶動。

行業整合擴大優勢

儘管踏入十一及十二月為傳統水泥淡季，市場需求或會有所減少，但海螺已於主要的華東市場與同業組成聯盟，透過大規模停窰以減少水泥的冬儲庫存，可望紓緩水泥價格下調的壓力。

同時，中央積極推動水泥行業整合，淘汰中小型水泥企業等落後產能，並預期明年將不再批准興建新水泥生產線，除可減少市場競爭外，亦為海螺等大型水泥企業提供購併機會。

海螺目前作為亞洲最大的水泥及熟料供應商，連同內地其他四家大型水泥生產商已控制了全國超過六成的市場份額，透過購併，相信有進一步擴大龍頭優勢，並提高議價能力。

基於24.3元是海螺今年的起步位，相信在22元至24元水平入貨，風險不大。即使股價短期或會受市況轉差拖累，但有耐性作兩至三年持貨的，刻下應是一個不俗的入貨機會。