股海實戰：神數軟件股首選

德國拍賣十年期國債竟錄得不足額認購，債息上升係必然結果。美國方面，正值感恩節假期，消費表現如何，將影響市場對聖誕及新年市道嘅睇法。

內地A股尋日雖然微升收市，但滬綜指及深成指依然未能收復心理關口。近期一直捱沽嘅銀行、保險及房產股，尋日表現略有改善，可惜成交未配合，滬、深兩市主板成交額僅1,037億元人仔，魚缸繼續缺水，每次市況反彈，都只能視作逃生而唔係追貨機會。

內房股無看好理據

港股亦同病相憐，尋日恒指先跌後回升，收報17,935點，升70點，但仍然未能重上萬八點心理關口，成交539億元。摩笛發功托內房，刺激相關股份絕地反擊，但阿莊不為所動，皆因深覺針對內房嘅調控政策力度只有收緊沒有放鬆，何能言好？此外，見牛熊證及窩輪成交額共228億元，佔大市成交額比例增至42.44%，論比例再創歷史新高，但若以實際成交額計，則尚未打破十月十九日的237億元紀錄，衍生工具活動繼續主導大市波幅。

工信部數據顯示，今年首十個月全國軟件收入接近1.5萬億元人仔，同比增長32.9%，較去年同期增幅提高3個百分點。單計十月份，全國完成軟件業務收入同比增長41%，乃今年單月最高水平，亦較九月份增速提升1.8個百分點，反映行業正在提速發展。

講到軟件股，尋日神州數碼（00861）股價異動，收報11.66元，升4.29%。事緣公司披露，旗下神州信息擬在A股上市。事實上，近幾年神數積極喺IT分銷及系統業務嘅基礎上，構建毛利率較高嘅IT服務業務，結果取得成功，睇番神數截至九月底止中期業績，服務業務嘅經營溢利貢獻達1.38億元，同比增幅達22%。

目前神州信息已發展成內地金融、電訊及政府行業嘅主要IT服務供應商，亦係內地製造業ERP軟件第一大供應商。今年以來，喺國家4號文件等產業扶持政策支持下，內地軟件業持續較快發展，神州信息嘅前景可予憧憬，偏偏神數現價往績市盈率只係十二倍，預測市盈率約十倍，估值並未能充分反映旗下IT服務業務嘅潛力。若然明年上半年能順利落實分拆，料有助體現其資產價值。再講，阿莊一直睇好神數近年積極推動「智慧城市」戰略轉型，喺內地軟件股之中，此股可繼續視為首選股份。