短炒倉：統一 表現硬淨可取

好耐冇見過嘅股仔洗倉場面，尋日又再重現，不過大概散戶都走晒去炒窩輪牛熊證，都係抱隔岸觀火嘅心態，所以市場反應唔係太大。旺旺（00151）和康師傅（00322）兩隻台資副食品股自宣布雙雙染藍後，股價表現不過不失，但在大市五連跌之下，都不能太過苛求。昨日兩股齊齊做好，在下月五日恒指改動生效前，相信都會持續吸引買盤支持。

講到旺旺同康師傅，亦可順便睇埋隻統一（00220），志強上月都曾介紹過，當日股價與昨日收市價4.54元差不多，可見現價水平相當硬淨。的而且確，利好副食品的因素，包括內地通脹回落，原材料成本下降等，在過去這一個月走勢愈趨明顯，故即使統一上月底公布首三季盈利下跌35%，但亦無改市場的看好態度，瑞信就繼續維持其買入評級，目標價5.41元。

以市值計，統一目前為163億，相對旺旺的961億以至康師傅的1,235億，染藍當然冇佢份，但以市盈率計，旺旺康師傅都超過三十倍，相對而言往績PE二十五倍的統一，炒作空間卻較大，4.5元樓下收集，以5元為阻力位，支持4.2元。

統一（00220）

阻力位：5.0元

支持位：4.2元