股海實戰：光大國際具炒作空間

港股「陰陽怪氣」，美股前晚急挫，恒指理應大條道理低開幾百點，偏偏又只係平水開市，淡友見狀加沽，誰知早段一度挾高129點，淡友冇鞋挽屐走。冷不防莊家冇幾耐又掉頭質低，恒指最低落過萬八點邊，尾市掉頭抽升，收報18,251點，升25點，大市成交582億元。總之兩、三百點波幅，左冚右冚，短炒難度甚高！

股票現貨冇人吼，散戶湧去衍生工具市場以小博大嘅心態可以理解。莊家們亦樂見其成，反正市況淡靜，指數推高推低一兩百點唔係難事，輪場同牛熊證市場聚集人氣，尋日牛熊證及窩輪佔大市成交比例達四成。究竟短線力守萬八點關係氹人落疊做好嘅假象，抑或真係穩守其上隨時再挾上「屠」熊？阿莊亦覺睇唔通，反正技術上大市仍然偏淡，但呢幾日跌市又似乎已率先反映外圍利淡因素，周四美國假期休市，港股先挾兩日等周五再插過嘅可能性亦不能完全抹煞！

股仔洗倉成焦點

除咗衍生工具交投暢旺之外，尋日股仔被洗倉亦成為魚缸焦點。見中國煤層氣（00578）股價單日最多跌87%；志高（00449）最多跌41%。一般而言，莊家股股價大插水，不外乎係隻股炒唔起，當股價跌至大股東按倉價便可能觸發斬倉潮，股價推倒重來洗牌再玩過，有番咁上下股齡嘅炒友應該深明此理，但想博大霧跟炒就要注意風險，宜嚴控注碼。

內地十月份外匯佔款總額出奇地按月錄得負增長，乃近四年來首次下跌，反映喺歐美市場情況轉差之下，部分熱錢流出中國，亦可解讀為人民幣升值放緩嘅預期升溫。如今通脹威脅已成功化解，熱錢流入嘅走勢又已逆轉，照計春節前後人行降RRR嘅可能性增加，而中央「微調」因素，正係如今港股「空」軍嘅最大憂慮所在。

早前醫藥股炒過一轉「十二五」行業規劃即將出台，尋日又輪到新能源股炒同一概念，見光大國際（00257）一度抽上2.71元，收報2.7元，升5.47%。事實上，新能源行業有政策護蔭，前景能見度確實較高，加上光國嘅環保水務及新能源項目已成功建立收益基礎，公司中期純利增逾四成，現價估值亦屬合理。

走勢上，其股價仍處於十月初以來嘅上升軌，近兩周成交明顯上升，短線調整只要守穩20日線2.45元樓上，可繼續反覆回揚，重上3元關可確認扭轉自去年末季以來嘅下降軌，若板塊炒風成氣候，現價仍有操作空間。