魚缸Blogger：威高國策扶持有睇頭
隔晚歐美股市驚濤駭浪，但港股尋日僅喺萬八關爭持，好淡雙方都未敢輕舉妄動，目前只好繼續跟進強勢股。恒指最新一次季檢中，威高股份（01066）將會踢走中海發展（01138）成為國指成分股，喺下月五號生效前，不妨打鐵趁熱望多兩眼。
雖然威高上季純利僅升11%至2.49億元人民幣，但近期資金對醫藥股重拾興趣，加上內地醫療器械行業喺十二五規劃中嘅產值將翻一倍至逾3,400億元人民幣，而威高喺內地消費力較強嘅一線醫院網絡又有近八成嘅覆蓋率，喺國策扶持下其前景仍有睇頭。
威高近日下試6蚊關後開出早晨之星嘅利好訊號，有利進一步反彈，阻力先睇6.8元，支持喺6蚊。
威高股份（01066）
阻力位：6.8元
支持位：6.0元