投資SUN國度：擺脫上落市折磨 期權雙邊投注

短炒最慘是左一巴右一巴，近期市場非常飄忽，一日氣氛轉幾次，跟市太貼只會人都癲，一定要擬定策略，以避免被市況牽住走，否則只會一日斬幾次倉，大市最終原地踏步，自己卻輸到嘔。

首先是較長線坐盤，要以個股為主，趨吉避凶去增加值博率，例如中資金融股剛由強轉弱，已不宜硬拚，寧願鎖定一些出口股博冷，或者跟風買石化股。買定離手之後，最好置諸不理，上落十幾格就震過貓王不是辦法，反正是博大市年尾前再來一次小陽春，就要堅持到底，如果坐盤心理壓力太大，惟有減磅減輕負擔。

炒股轉身慢易重創

至於超短線方面，反而要放棄個股。市場深度不夠，難以掌握往往一瞬即逝的轉身機會，例如昨日早市做好，十五分鐘後已驚覺中伏，股票可能剛剛才買完，立即斬倉又要至少十五分鐘，出入過分論盡，會令人的紀律性減低，容易一次失手便重創。

另外，最好以其他二十四小時運作的市場作為出擊工具，如果炒香港期指只宜即日鮮，因為市場氣氛一日轉幾次，坐隔夜盤等到香港開市往往已是另一個世界。前日自己坐淡倉過夜對沖，美股大跌居然沒有錢贏，假如以美國標普期指行動，便不會蜑家雞見水。

當環球市場走勢相關性提高，大家都是由同一焦點所主導的話，靈活性不夠的工具便不夠競爭力，延長交易時間是值得認真考慮，不能被小經紀行拖慢步伐。

如想擺脫短線上落的折磨，可買一套行使價較遠的Call Put，例如十一月的19,000 Call加17,000 Put，市場不會長期窄幅徘徊，而且感恩節假將至，以近來經驗，主要市場假期通常都是突擊時刻，整套期權金約120點，炒期指的話，兩三個回合上上落落之間，都已經輸掉這個數，倒不如豁出去睇足五個交易日。