銅鑼灣舊樓拍住豪宅價

自從內地放寬個人遊來港，令大量資金湧入本地零售市場，貴為本港舖位數一數二貴嘅銅鑼灣羅素街，由於貨源已經歸邊，現時唔單止地舖難求，即使樓齡四、五十年嘅舊樓單位，就算有業主願意割愛，依家閒閒哋呎價都要3萬元先有交易，劉Sir發現羅素街26至28號一幢約六層高舊樓，响今年內先後錄到3宗成交，啱啱有一個中層單位以1,600萬元賣出，呎價超過3萬元。

羅素街26至28號係一幢一九六三年落成嘅舊樓，現時樓齡已經四十八年，地下係舖位，樓上每層約有3伙，今次以1,600萬元賣出嘅中層單位，據差餉物業估價署資料顯示，個單位實用面積約506方呎，呎價約3.16萬元，而原業主喺○八年以680萬元買入上址，依家帳面賺920萬元，升幅近1.4倍；而呢幢舊樓今年初有一個頂樓單位更加以1,800萬元賣出，當時呎價約3.7萬元。

樓上舖呎租被搶貴

以常理嚟講，用豪宅級嘅呎價去買一個舊樓單位，當然唔可以睇個單位表面價值，事關依家羅素街地舖爭位情況相當激烈，新簽租約同舊租金比，往往以倍數上升，連帶樓上舖嘅價值都大為提升，有老友同劉Sir講，依家羅素街嘅樓上舖，以建築面積計，估計呎租要60至80元。

投資者揸舊樓博收購

另一方面，隨着羅素街嘅貨源已經歸邊，好多已經統一業權嘅舊樓亦相繼重建為新式商廈，所以有重建價值嘅舊樓唔多，唔少投資者都希望買番一、兩個單位諗住博收購，以羅素街26至28號為例，有幾個業主都持有多過一個單位，據聞有個發展商或相關人士更加揸咗接近一半單位。

至於隔籬22至24號舊樓，同樣係幾層高嘅舊樓，去年中就由英皇國際（00163）以11億元買入，當時嘅呎價高約11.7萬元。照咁睇，相信羅素街除咗係全港地舖貴價街道之一外，亦係最貴舊樓街道。