股海實戰：中生製藥考驗2元承接

歐債危機未解決，又要睇美國削債談判鬧劇，港股尋日殺落萬八點，收報18,225點，跌1.4%，期指大低水114點。尋日有28隻恒指牛仔被「宰」，估計莊家要贏盡，未來幾日會力壓指數，暫宜觀察恒指喺17,800至18,000點水平承接力。

阿莊每年末季都會去粵北一趟，充分感受到呢幾年內地消費市場嘅發展。近日舊地重遊，見全市最旺嘅步行街，體育用品店成行成市，安踏（02020）、李寧（02331）、361度（01361），講得出嘅牌子都齊集，普通產品售價要兩百蚊樓上、貴嘅一千幾百都有，款式同價錢都可與國際品牌比較，但質量就差一截，再計埋人仔匯率，阿莊當然買唔落手。未到聖誕新年，各大品牌經已做緊七折促銷，但人流唔多，睇怕下月節日消費高峰期，「瘋狂」減價清貨在所難免！

體育用品股勿撈底

呢幾年內地體育用品股大肆擴張分店網絡，以開鋪全國性銷售網來狂谷估值，但呢個泡沫大抵經已爆破，如今行業要面對過度擴張嘅後果，幾家龍頭今年已相繼易帥迎戰，但清理存貨及調整發展策略等措施成效需時顯現，故阿莊維持原判：呢類股尚未到撈底時候。

藥業股炒「十二五」產業政策下月出台，尋日中藥（01093）、上藥（02607）、國藥（01099）、銘源（00233）及泰凌（01011）均逆市靠穩。剛宣布季度業績嘅中生製藥（01177）就升2.6%，收報2.33元。

今年首三季，中生製藥營業額43.4億元，同比增長44%，但由於股票投資錄得1.7億元虧損，故期內純利僅2.8億元，同比下降11.8%，但撇除相關因素，實際純利4.5億元，增幅31.8%。

該股可取之處係銷售嘅藥品夠多元化，包括心腦血管、肝病、抗癌、鎮痛及糖尿病等用藥，正好迎合內地居民生活水平提升，都市病個案增加嘅趨勢。此外，公司收購邵陽正骨醫院股權嘅交易已獲批，投資醫院策略意義較大，料會繼續推進購併步伐，長遠可在醫藥行業嘅整合過程中分一杯羹。

綜觀第四季初股市有反彈，但臘月表現如何尚屬未知數，估計全年度業績仍受股票投資虧損所影響，故入市策略毋須急進，可待試2元關支持再作考慮。