售轉租拖冧屋租終倒插

近排樓市麻麻，唔少業主都揸唔定主意究竟好唔好放盤，以致轉賣為租個案急增，租盤多咗租金自然受壓，持續咗兩年半嘅租金升勢亦告「斷纜」，劉Sir參考代理數據所得，上月本港85個大型私人屋苑平均呎租按月跌約0.5%至20.5元，係○九年三月以來，近三十個月首次下跌，10大屋苑中亦有8個呎租回落，以紅磡黃埔花園跌勢最急，按月減少約4.1%至23.5元。

自從舊年額外印花稅推出後，投資者買咗磚頭都只可以收租，租盤已經不斷增加，而早排施政報告又講到復建居屋，搞到人心惶惶，二手交投「死寂」；另一方面，按揭息口又係咁升，換貨成本貴咗，業主留番個單位收租都唔難理解，市場租盤大增，租金唔跌就難啦。

黃埔花園月跌4%最急

臨近聖誕新年，係租務市場傳統淡季，中原一份研究報告提到，本港85個大型屋苑上月平均呎租按月回落約0.5%。表面睇跌幅輕微，但重點在於上個月前，租金已經連續升咗三十個月，即係自○九年三月後，呎租由當月約13.2元，累升約56.1%至今年九月的20.6元，不過，花無百日紅，上月平均呎租終按月回落0.1元，至20.5元。

有關數據又顯示，十個大型藍籌屋苑當中，有8個平均租金喺上個月跟住大市回落，以上述黃埔花園跌得最勁，按月租金大跌約4.1%至23.5元。

其次鰂魚涌太古城亦跌約2.1%至28.4元，其餘6個屋苑跌幅則介乎0.5%至1.5%不等。

嘉湖呎租價唔使十蚊

祥益代理老友吳偉忠講，嘉湖山莊樂湖居5座低層C室以每月7,000租出，呎租9.9元。

至於新盤租金表現都未如理想，有代理老友爆料，元朗洪水橋尚城5座低層C室，面積992方呎，以月租1萬元租出，呎租只係10.1元。