股海實戰:粵投有力創新高

意大利通過財政報告兼總理同意請辭,港股乘機試破悶局,惟恒指逼近100日線20,175點便卻步,收報20,014點,升335點,成交605億元。執筆時,意債孳息抽穿7厘,歐股掉頭向下。睇嚟除非短期內地有進一步放鬆銀根嘅措施出台,否則大市尚未能擺脫上落市,要有心理準備提早歲晚收爐。

阿莊持有嘅安碩A50(02823)再次受阻於12元關,遂以平均價11.98元沽出五萬股。另尋日已提到高追電力股存風險,見手持嘅華潤電力(00836)衝上高位15.42元便回頭,遂把握機會鬆綁,以均價15.3元沽出五萬股。至於買入博炒CPI嘅旺旺(00151),尋日數據公布後,股價彈至7.4元便掉頭,既然冇料到都係打退堂鼓,遂以均價7.3元沽出五萬股。

京信通信可炒落後

雖然已沽出大部分持股,但相信停留喺市場內嘅游資仍會繼續炒作二、三線股,靠密食當三番幫補一下,故短線若有心水仍會落場短炒。前日話電訊設備股有鑊氣,回咗一日尋日又再炒過,中國無線(02369)升14%,晨訊(02000)升12.68%。若短線炒作氣氛持續,京信通信(02342)具炒落後條件,另A8電媒(00800)亦可小注破旗形突破。

領匯(00823)中期盈利及派息理想,股價創五十二周新高。繼續發掘呢類跌市奇葩,粵海投資(00270)亦有條件入選,尋日股價一度重上5元關,高位見5.01元,收報4.99元,升3.96%,與五十二周高位5.17元距離不遠。

今年底粵港兩地將會簽訂新嘅供水協議,水價上升係定局,只係增幅多少而已。事實上,供水業務佔粵投收入逾半,公司收益有保證,喺不明朗嘅市況之中,避險功能凸顯。睇走勢,年底前股價有望再創五十二周新高,短線回吐守4.8元可小注,目標睇5.5元,穿4.5元止蝕。

地產網大革新,即睇最新樓價走勢、最全面地產新聞及筍盤情報!

「Money18免費即秒股票報價網站」現推出8升級功能,財經資訊,實時實發!

阿莊

粵港將簽訂新供水協議,水價上調幾可肯定,粵投自然受惠。(資料圖片)