樓市出更：黃竹坑工廈升呢索逾6億

隨着南港島線將貫通南區同金鐘，區內首站的黃竹坑將最享地利，尋日聽科達地產主席湯君明講，佢哋喺區內嘅工廈科達設計中心，樓齡啱啱夠十五年，啱啱拍板活化改裝為賓館，預計可以有399間房，佢話預算投資近2億元，不過，若果有人想同佢現狀全幢買，就至少要6.2億元。

湯君明同劉Sir講，工廈活化措施可以將舊有工廈提升潛在價值，對唔少業主都有好處，至於佢旗下香港仔黃竹坑道62號嘅科達設計中心，係自己九十年代中一手一腳興建，物業大部分樓層都有窗，啱晒做旅客住宿，依家已經搵咗則師入則搞活化，諗住改裝為賓館，提供399個房間。佢仲話，若果每間賓館房間改裝費約50萬，成個翻新費應該唔使2億。

擬40億入貨無功而返

佢話搞工廈活化最頭痛嘅嘢唔係消防設備，而係滿足運輸署要求嘅車位數目，依家佢同則師研究緊，將大巴車位數目減少，同時增加更多貨車車位，希望可以獲得通過。

問到依家物業投資市場，湯老闆話，投資物業租金穩定，業主都好惜售，佢話早前諗住趁低位攞三、四十億入貨，點知全部最終都傾唔掂，足見業主十分睇好後市。

景福街地舖漲租1.6倍

佢仲話，之前去上水石湖墟視察自己個商業項目，行過附近一間原為鞋店的地舖望吓，個代理同佢講，業主索價每月租金差唔多35萬，湯氏心諗，個舖之前月租只係幾萬，依家叫租飆升十多倍，足見自己當年無睇錯該區嘅升值潛力。

多個工廈舊區近年變天，其中受惠於區內有大型私人屋苑及商場落成嘅新蒲崗，零售氣氛明顯增強，由以往五金同埋車房等租戶，逐步由專業機構及連鎖特色食肆等取代，聽講景福街一個原本由倉儲公司租用的單號舖，啱啱畀設計公司以每月約2.5萬租咗，租金狂升超過1.6倍。

目前該區平均呎租由兩、三年前的約10餘元，上升至目前的約20多元，代理料優質地舖呎租明年有機會升至逾30元。