市場徐想：亞洲果業快高長大
亞洲果業（00073）做嘅係農產品生意，有負責種植、栽培同銷售嘅部門，同時亦積極開發同銷售農產品批發市場同鮮橙加工中心嘅物業單位，集團經營嘅業務比較簡單，唔難理解。
喺二○一一年度，集團嘅合浦種植場種咗130萬棵橙樹，有110萬棵可收成，收成率達84%。集團現正進行改革計劃，準備喺合浦種植場改種，剷除場中嘅冬橙樹，改種夏橙樹。有乜分別？咪就係增加集團嘅平均收成囉！而且，夏橙樹比冬橙樹嘅每噸收益更佳，絕對有利集團業務發展。
另外，集團嘅信豐種植場已有160萬棵冬橙樹，亦即係話如果合浦種植場個計劃有顯著成效，信豐種植場嘅改種計劃亦指日可待，所以，其實合浦種植場只係一個試點，用意係全面提升集團嘅業績。
數據方面，亞洲果業增長迅速，近幾年生意愈做愈大，今年盈利更錄得89.6%增長，息率逾3%，市盈率約4.5倍，勝在夠便宜！一於繼續追蹤，出發！