Fundman睇市：華潤電力博反彈首選

港股走勢繼續梅花間竹，上星期五勁升600點之後，周一返嚟又插過，恒指跌164點，報19,677點，希臘唔搞公投甚至提前大選，希臘官民因為要迎接救援鈔票，惟有跪地餵豬乸，承諾過一段緊日子，可是，重頭戲仲係經濟及債務規模比希臘大N倍的意大利，係咪照辦煮碗就搞得掂？

德國總理默克爾夫人周末話畀十年時間歐盟，歐債危機有得救，先不談默夫人仲有幾多年總理做，今時今日，炒家連坐一日艇都唔想，債商紛紛投下不信任票，意大利十年國債孳息周一一開市，就由上星期的6.33厘抽上6.63厘（德國發的十年期歐元債孳息只係1.76厘！），創九七年加入歐盟後新高，歐盟同國基會在歐債危機上，醫得頭來（希臘）腳又痛（意大利），二十國峰會連最基本的EFSF錢從何來都未傾掂（德國央行剛表明唔會動用黃金儲備為EFSF融資），咁落去點收科？

最令人擔心係歐盟、歐央行及國基會向來歎慢板，德法兩大指數仲比今年低位高18%及13%，財長們望住個股市，大有你急佢唔急之感，史提芬唔敢話今浪反彈喺20,272點經已行人止步，但大市總成交由兩星期前曾過千億，到今日得番555億，沽空佔大市成交亦跌到落去7至8%，連淡友都無意欲加注，加埋年尾成交例淡，與其繼續睇住買賣兩閒的政治市，不如諗吓聖誕新年去邊度度假好過。

建行再成淡友焦點

歐債危機新解決構思欠奉，G20峰會反而就防止銀行業在歐債危機中受衝擊，提出防範措施，列出29間需要增加更多資本的跨國銀行，被選中的，要在一二年前交報告，提出一旦倒閉，要點樣分解本身業務，以及一六年前必須較其他銀行持有較高資本比例，香港上市的有中行（03988）及滙控（00005），股價分別跌0.05元及0.7元，報2.71元及66.9元。間接受影響仲有建行（00939），因為29間銀行中包括建行策略股東美國銀行，市場揣測美銀兩個月前沽掉手上一半的建行股份套現83億美元後，另外131億股H股可能都唔揸得幾耐，因為咁，尋日建行沽空金額4.1億，排沽空榜榜首，短期可能又會成為淡友焦點，準備掟定嚟等執平貨。

跌市中，最搶眼要數電力股，潤電（00836）升0.54元，報13.82元，升幅乃藍籌之冠。

基金經理押注電力股，應該同周三內地通脹數據公布有關，近期大行估得愈來愈樂觀，最新預測係由九月的6.1%，大幅回落至5.5%，部分極端樂觀的，如DMG及德銀，更估計跌至5.2及5.3%。上月，內地電監表示，內地供電緊張，供求缺口擴大，緣於行業處於電煤漲價、電價滯後、電企虧損及調價艱難的惡性循環中，惟有適時上調電價才可解決問題，但通脹卻成了加電價的緊箍咒。

睇番潤電往績市帳率1.46倍，仲比○八及○九年海嘯後兩次低位1.78倍及1.82倍，折讓一成八，春江鴨行動，主要押注電價上調的機會，假如十月份CPI回到6%樓下，通脹見頂獲確認，中央為要提高電企積極性，透過提價刺激今冬明春發電量的機會頗大。對比幾間國企，營運效益表現最佳的潤電，肯定係基金博反彈首選。