樓市出更：大款撐住核心舖逆市照搶

近幾年內地豪客來港狂掃高檔奢侈品，唔少高檔鐘錶及金行都喺核心旅遊購物區，以十分進取租金搶舖；資深投資者盧華嘅尖沙咀加拿芬廣場地下2、3及5號舖，啱啱就租咗畀周大福，月租大約65萬，比之前連鎖個人護理商戶畀開嘅租金，加咗差唔多三成；同時，同一幢大廈一個地下連地庫逾萬方呎巨舖，早前亦獲金行同大型時裝商戶爭租，佢哋見多人爭，租金就調高到近100萬。

雖然外圍經濟麻麻哋，但本港零售市場有內地客撐住，唔少鐘錶及金行都對後市充滿信心，積極喺尖沙咀、銅鑼灣等高消費地區搵舖擴充。

萬二呎巨舖索租百萬

聽投資者盧華個助手講，近期加拿芬廣場全幢銀座式商廈地下一個原由連鎖個人護理商戶租用多年嘅地舖，面積大約3,042呎，由於租約期滿，早前畀周大福睇中，以每月約65萬承租，較前租金增三成。

唔單止咁，該廈一個地下連地庫嘅巨舖，面積差唔多萬二呎，早前已經有金行同大型時裝願意以每月約88萬元洽租，不過，盧華就有感個舖罕有，加上有咁多商戶有興趣，所以轉為善價而租，依家索租差唔多近一百萬元，仍有不少商戶有興趣，問緊租期等詳情，相信好快有結果。

鐘錶店金行 出手最勇

事實上，近年核心零售區一線靚舖租金升幅令人咋舌，多年前承租出手最勇嘅化妝品店，近年風頭不敵鐘錶及金行，好似銅鑼灣啟超道一個由化妝品租用的雙號地舖，連鎖金行早前以每月約220萬奪得上址，較前租金多超過一倍。難怪莎莎（00178）主席郭少明早前都話，本港租金上升，成本亦水漲船高，期望透過推廣增加人流，以抵銷壓力。

另外，尹姓投資者亦睇好新界西零售市道，依家加價3%加推天水圍中新天地廣場1樓15個分間舖，入場近400萬元，為吸引收租佬，依家更新增兩年五厘租金回報保證。