Fundman睇市：卓悅高增長故事不再

連續兩日的G20峰會，因希臘一度準備搞公投而陣腳大亂，最終無實質成果。上周五，意大利十年國債孳息升至6.33厘，同德債的1.82厘愈走愈遠，儘管全球股市紛紛由九至十月低位強勁反彈，但債券市場卻完全睇唔到歐債問題短期內有機會解決的迹象！

八、九月份，先有美國國債上限可能趕唔切調高的危機，再來是希臘及另外四隻「歐豬」國的債務問題，唔少基金面對大客戶贖回壓力，焗住沽貨，結果十月份技術反彈，唔少完全享受唔到，依家仲有八個星期二○一一年就要講拜拜，今年大幅跑輸指數表現的股市基金，在時間有限下，好有機會在年底前焗住落注，希望趕在今年剩餘的三十幾個交易日內追番多少，唔少行家揚言，今年表現花紅已成奢望，只祈求基金唔好跑輸大市太多，搞到年底連個飯碗都打爛埋。

芬佬追貨淡友投降

歐債問題未見解決契機，上星期五希臘臨門一腳放棄公投，經已夠一班芬佬忙住追貨，上星期，環球股票基金錄得45億美元淨流入，當中35億來自非指數基金（ETF），全部是長倉基金（long only），係九個星期以來首次。恒指升600點，報19,824點，成交734億元。值得留意，大市沽空金額51.6億，佔成交比例縮去到7.03%，乃今浪跌市自八月一日開始以來最低，可見長倉基金補倉外，就連淡友都有投降迹象。

有兩單消息吸引了筆者興趣，先係康師傅（00322）以非上市的康師傅飲品股權，換取百事可樂中國的非酒精飲品業務全部股權，若非善忘，可口可樂收購匯源（01886）及Yum!收購小肥羊（00968），先後被商務部以反壟斷為由，一單無疾而終，另一單仲拖住，今次百事碰不到康師傅上市股份，且連認購權在內，最多只揸康師傅飲品股權兩成，是學精了，但睇見百事裝瓶廠業務去年勁蝕1.75億美元，內地企業走出去，向美國公司收購蝕錢資產，極少有好下場，康師傅股東要審慎留意事情發展。

化妝品零售商卓悅控股（00653），大股東主席葉俊亨夫婦，最近在市場減持7,800萬股，每股1.3元，套現1.014億元，是四月減持760萬股後，今年大股東第二次減持。

早前有投行為卓悅撰寫報告，指今年「三一一」地震，對卓悅的日本奶粉生意有負面影響，目前公司有四成銷售來自內地客，今年黃金周同店銷售得6%（撇除奶粉的影響有14至15％）增長，數字是不過不失。常言道香港零售生意，等於同店舖業主打工，租金佔收入比例，由去年上半年的9.5%升至11.2%，卓悅大約三分一店面在未來六至十二個月續租，估計租金佔收入比例會升至12%樓上。

大股東減持有好多原因，未必是睇淡前景，不過，受惠內地遊客消費以及日本奶粉生意，卓悅股價由海嘯低位累積升超過七倍，但面對租金上升，內地客消費可能放緩，股東鎖定多年營運成果無可厚非，但相信未來三年，要擠出像過去三年般的高增長，機會唔大。