樓市出更：買家拒接火棒寧租樓

地產代理數據顯示，第三季10個主要藍籌屋苑之中，有6個屋苑連續三個月出現租多過買，情況相當罕見，劉Sir問過啲學者，亦認為此情況係反映樓價已達致市民不可接受嘅高位，所以預期租多過買會維持至今年底。

根據地產代理嘅資料睇到，全港10個主要藍籌屋苑中，六月時其中9個有租多過買嘅情況，但到七月就全部屋苑出現交投超過買賣局面，除咗○八年金融海嘯發生期間曾出現過此現況外，近呢幾年絕少出現，而今年八、九月持續都有8及6個屋苑喺以租務為主。

若以屋苑分析，一向以用家主導嘅藍田麗港城，喺七至九月期間，租務比例連續三個月高超過七成，九月份更加逼近八成；至於東涌映灣園同鴨脷洲海怡半島，過去七至九月期間，亦都係連續三個月租務比例高約七成水平，九月時比例分別去到約77%及72%。

而向為樓市寒暑表嘅鰂魚涌太古城，過往每月屢錄破百宗二手成交，但今年二月開始，已連續八個月租多過買，相信今年內樓價急升，令趨勢更明顯。另一個一向受炒家同用家熱捧嘅荔枝角美孚新邨，近幾個月租務比例升幅都好明顯，由四月時約莫三成六，升到去九月嘅近六成。

學者：樓價超市民負擔

本地經濟學家關焯照話，樓價不斷咁升，已超出市民可負擔水平，加上政府新嘅土地及居屋政策，令市民對後市更加觀望，喺唔想接火棒嘅情況下，買家寧願轉買為租，等樓價跌番啲先入市，所以最近就出現租多過買情況。雖然最近頻頻出現買家鋤價情況，對樓價已有下跌壓力，但相信去到年底租多過買情況仍然持續。