Fundman睇市：旺旺等調整執平貨

希臘總理帕潘德里歐話：「唔係你想救，就畀你救」，德國總理默克爾及法國總統薩爾科齊聯袂想勸服「希臘長毛」，結果碰到一面灰收場，三、四號康城舉行的G20峰會，不單要揼金磚四國心口，為EFSF的4,400億歐元籌旗，仲要睇實帕潘德里歐會否被倒閣。那邊廂，意大利十年期國債孳息抽至6.4厘，創入歐盟後新高，放响歐盟與國基會面前等拆的計時炸彈，肯定唔止希臘一個。

前晚聯儲局議息，好友們一廂情願的QE3，影都唔見，反而聯儲局調低咗美國經濟預測，並揚言高失業率將要持續一段時間，既然無真金白銀刺激計劃，伯南克學前輩格林斯潘，以出口術實行托得幾耐得幾耐，重申超低利率會維持到二○一三年中。不過，大家不禁問，假如未來半年經濟同樓市仲係半死不活，奧巴馬能否連任都係未知之數，共和黨打晒開口牌話唔畀伯南克留任，兩年零息承諾會唔會只係開空頭支票，惟有等時間話畀我哋聽。

完成挾淡轉炒消息

現金是王，永遠係不明朗市況下的金科玉律，恒指尋日跌491點，收19,242點，前日反彈的363點，跌凸收場。期指在最後十五分鐘，由過百點低水炒番上高水50點，收市報19,292點，連即市炒家都亂晒龍唔知企邊面。恒指自十月初開始，短短十八個交易日內，由16,170反彈上20,272點，合共4,102點，值得留意，過去十個交易日，沽空金額再無法突破大市成交一成的界線，高於9%也只得一日，可見十月的報復式升市，趕走唔少空軍。隨着補淡倉升勢開始失速，後市好可能跟消息炒，呈日升日跌的難玩格局。

十月內地採購經理指數（PMI）遠低過市場預期，反映製造業增長繼續放緩，配合農產品價格有見頂回落迹象，市場近日預期，中國十月份通脹會回到6%樓下，進取的，更估會低於5.5%。

去年下半年，已開始有大行預測內地通脹見頂回落，只係真正出現足足遲了一年，但遲到好過無到，撇除壓抑樓市強硬措施，至少中央的緊縮調控政策，有機會因為通脹見頂回落，在部分範圍內，有稍為放寬的可能。

食品及農作物佔內地通脹指數比重達八成，通脹放緩，意味食品及原材料價格都會相應回落，立即令筆者想起，過去幾季毛利飽受壓力的副食品股。睇番中國旺旺（00151），毛利率在○九年下半年，達42%，跟住一○年上下半年，回落至38%及37.2%，到今年上半年，更只得32.9%，今年中期業績，亦因此只多賺4%至1.67億美元。

或者十多年來港股經歷風浪不少，今日的投資者愈來愈精明，睇番旺旺，股價今年仍然有3.5%升幅，遠遠跑贏大市，即使在山泥傾瀉般的八、九月跌市，股價去到6元樓上已行人止步。毫無疑問，一旦毛利率回到38.5至39%的歷史平均水平，旺旺業績增長將會相當顯著，這爆發點或在一二年或一三年初出現，支持估值快速回落。史提芬依然看好明年旺旺的股價表現，但鑑於今年股價跌得太少，捧場客較適宜等一些特殊的動盪環境，在調整時慢慢收集。