股海實戰：光大控股隨時發力炒上

歐債危機又再生變，希臘威脅攪公投，令意大利十年期國債孳息創出歷史新高，加上美國聯儲局會議冇料到，QE3見唔到，仲調低咗明年經濟增長預測，結果前日外圍升市，港股無福消受，恒指尋日低開逾300點，收市報19,242點，跌491點，成交785億元。

康城向以「影展」聞名，但尋晚星光熠熠下嘅主角唔係電影明星，而係政界要人，包括歐盟成員國元首以及金磚四國領袖。執筆時尚未知有咩嘢講，但見歐洲魚缸早段唔係想像般咁差，希臘執政黨為求自保正要求總理下台。阿莊預計，恒指喺兩萬點關前繼續以數百點波幅上上落落，直至方向漸趨明確為止，支持位18,800至19,000點不宜有失，向上衝穿上周高位20,272點將引發補倉盤入市追貨。

A股尋日衝高位受阻，滬綜指見過2,535點後回落，收市僅升3點，報2,508點。但國壽（02628）未受A股回吐影響，尋日股價逆市升3.9%，收報21.15元，成交達到24.4億元，似乎喺下周CPI數據出爐前，有資金流入布置。總之，阿莊近日上車短炒嘅A50（02328），短線向上衝穿12元就有景，向下失守10.9元要睇位走人。

大型新股趕尾班車

市場消息指周大福將於下周進行上市聆訊，而內地海通證券亦會喺今個月下旬進行上市聆訊。一切順利嘅話，預計兩隻大型IPO將於聖誕節前在港掛牌。

呢兩隻IPO集資額合計講緊成400億元，規模唔細，未知市場胃納如何，但拖到明年，變數更多，所以估計公司會爭取趕上尾班車，而為咗增加勝算，會唔會向認購者派定「聖誕禮物」，海通有A股在先，照計唔會有幾多水位益散戶；至於周大福，以大股東嘅作風，又似乎唔可以存太大期望。所以，與其諗入飛認購，倒不如博吓影子股。海通上市，呢兩個星期分屬同類股嘅中信証券（06030）經已蠢蠢欲動，尋日收市價15.98元，乃上市以來收市新高。

短線挑戰12元關

繼續聚焦同類股，投資光證及光銀嘅光大控股（00165），聽聞旗下嘅光銀亦正爭取重啟在港嘅上市計劃。走勢方面，自年中跌穿了兩年多嘅橫行底部後，九月底光控股價終於喺7.4元找到支持，上月底回升至11.74元收市。本月初喺高位整固，10日線10.9元現支持，尋日逆市升2.47%，報11.64元，短線若能突破12元關，可嘗試回補八月初下跌裂口位（12.88至13.5元），支持位喺10.4元。