投資移民客趕掃細盤

政府去年將房地產剔出投資移民類別，嗰批成功獲批又未買樓嘅「末代」投資移民客，近排紛紛「蒲頭」買樓，劉Sir收到風，有「末代」投資移民客啱啱以199萬元買入沙田河畔花園高層戶，最近4個月內已經喺嗰區連掃3個住宅單位，涉資共600幾萬。

內地客一向鍾情投資香港豪宅，最好有咁豪得咁豪，但有部分內地客鍾意細價樓，貪佢哋銀碼細，但回報動輒有4至5厘。近日市場就多咗好多「末代」投資移民客把握最後入市機會，個別仲分散投資，買夠幾間細價樓湊數，收起租上嚟都咪話唔「和味」。

河畔回報高獲掃入

代理老友同劉Sir講，有「末代」投資移民客最近4個月內用約600幾萬連掃沙田河畔區3個單位，包括2個河畔花園同1個花園城單位，其中最新鮮熱辣買嘅河畔花園E座高層1室，售價199萬元，相信租金回報約4.6厘。

中價樓就更加係投資移民人士嘅追捧對象，好似鰂魚涌太古城耀星閣高層A室，早幾日就由投資移民客用咗712萬元承接，呎價超過1萬元。其實近排多咗投資移民客爭住入市，劉Sir真係唔覺得出奇喎，因為申請咗梗係要喺限期前買樓，無謂嘥咗個quota啦。

內地專才萬四租濱南

事實上，環球經濟動盪對於實力雄厚嘅內地客影響較細，無論買賣或租賃市場，處處都有內地客嘅蹤影，老友同劉Sir講，好似元朗YOHO Town第6座低層B室就由內地客以445萬元承接；另外，剛以月租1.45萬元租出嘅紅磡海濱南岸2座高層A室，新租客都係內地專才。