短炒倉：中國食品 前景樂觀

唔記得邊個講過，假如你欠了銀行1萬銀還不出，你會有麻煩，但若果你欠了銀行1億還不出，有麻煩的就會是銀行。咩嘢係債仔惡過債主，呢兩日睇睇希臘就可以見識到，看來歐債危機仲係有排搞。之不過，港股之前插到落萬六點，其實都已經預咗希臘賴債，所以當前的小吵小鬧，可以話係冇有怕，加上市傳中央放水，港股得以上演單日轉向，拗腰回升。

內地通脹預期將放緩，對食品行業有利，去年受累成本上漲令盈利倒退的中國食品（00506），早前公布的中期業績顯著改善，賺3.15億元，增長76.5%，旗下四大業務中，除休閒食品仍然不振外，其餘都有理想增長，其中以食油為主的廚房食品業務，分部業績大增682%，至7,433萬元，至於飲料和酒類業務，分部業績分別為2.75億和2.99億元，增長29.6%和81%。

論估值，中國食品絕對唔平，現價往績市盈率高達四十倍，不過基於中期業績有驚喜，加上內地通脹見頂回落，勢將有利食品股毛利表現，故中國食品盈利前景仍值得期待，昨日股價隨大市回升收6.26元，不妨在6元水平收集。

中國食品（00506）

阻力位：6.8元

支持位：5.6元