股海實戰：聯通再衝18元

希臘發窮惡，話要就歐盟救助方案搞公投表決，前晚歐美股市齊齊玩跳水。可幸中國因素再次發揮積極作用，尋日A股先跌後回升，滬綜指重上2,500點關，連帶港股亦單日轉向，恒指由全日低位19,024點反彈至19,733點收市，倒升1.8%。

阿莊相信，恒指向上兩萬點關好淡必有一番爭持，一旦抽穿上周高點20,272點，喺補倉盤帶動下，升勢將會轉急。呢期阿莊唔敢再睇得太淡，除咗因為祖國話要「微調」，銀根略為鬆動對A股起支持作用外，股友之中有位大淡友，八月初以來獨「沽」一味贏到開巷，但近日聽見佢話經已平晒淡倉，細問之下，原來佢預計年底前恒指有機會抽番上八月初嘅水平，所以暫時唔會再做淡，但就叮囑一句，明年港股唔會有運行，想搵定啲過股海寒冬，呢兩個月就要好好把握機會用心經營咁話！眼見當運之人有咁嘅睇法，所以特別上心。

尋朝見恒指穩守萬九點，遂按周初策略，從安碩A50（02823）入手，以平均價11元買入5萬個單位。板塊消息方面，明年農機補貼增加，刺激一拖（00038）股價做好，以全日高位7.5元收市，升幅近一成。

至於雨潤（01068），尋日低見11.98元後現反彈，收報12.74元，跌幅2.3%。大摩同瑞銀不約而同維持雨潤評級不變，但大摩就將其目標價由7.4元上調至12.6元。不過，始終尋日股價跌穿咗前日低位，所以都係睇定啲先再諗。

跑贏中移有理由

市傳中國聯通（00762）最快會喺下月底前引進iPhone 4S產品，並已就相關嘅服務套餐同物流等配套作好準備。另一方面，中移（00941）遲遲未見有推iPhone產品嘅進展，兩大巨頭一比下去，聯通自然勝一籌，今年以來股價遠遠跑贏中移，自有其原因。最近大摩亦就內地電訊股發報告，雖然將聯通目標價下調1元，至19元，但就強調依然傾向睇好聯通。

事實上，中資電訊板塊受宏觀經濟變化影響較低，加上經營現金流可觀，喺內地智能手機應用日廣，帶動數據用量及增值服務需求增長下，前景向好。今年聯通股價一直領跑，五月以來見雙頂，但八月以來底部支持亦明顯上移，若年尾兩地股市真係再炒一轉，股價有條件再試衝18元關，15元支持不容有失。