英錶租屯廣巨舖食正北水

內地豪客撐起本港零售市場，主要消費旺區上季嘅租金都全線上升，由於唔少內地旅客都取道西部通道或者皇崗口岸來港，新界區零售市場愈嚟愈重要，英皇集團就洞悉呢個趨勢，早前決定進駐屯門市廣場，預租咗一個大約四千方呎嘅巨舖，成為集團旗下鐘錶珠寶店喺新界區內首間店舖。

近幾年英皇集團旗下英皇鐘錶珠寶（00887），除咗積極喺核心零售區擴充，亦率先進駐新界區，英皇國際（00163）執行董事張炳強話，集團睇好內地旅客強勁消費力，知道佢哋唔少來港首站都會去屯門等新界地區觀光購物，所以早前拍板承租屯門市廣場內一個大型商舖，預計明年中前開業。

屯廣商場生意料80億

信和集團租務部總經理陳欽玲同劉Sir講，屯門市廣場近期都引入唔少大型高級鐘錶珠寶店，短期內仲有多幾間傾緊。依家商場內地客比例大約18%，比起年初多咗8%，有信心明年可以升到22%。另外佢話，今年商場聖誕節推廣費要1,000萬元，按年多一成，至於本月及下月營業額相信將達15億元，全年營業額達80億元，比舊年多一成，相信係集團商場之冠。

雖然近期股市大上大落，但本港一線舖位租賃市場未有受損，睇番世邦魏理仕啱啱出嘅報告，第三季主要零售區舖租按季升咗2.2%，平均呎租差唔多升到555元。其中，傳統旅遊區嘅尖沙咀，按季飆11.1%至平均呎租573元；另一消費旺區嘅銅鑼灣期內亦錄到按季升8.3%，平均呎租差唔多612元。

地舖難出貨紛改短租

另外，今年銀行對按揭審批都好手緊，唔少舖位出貨難度比舊年大好多，為咗減低揸貨成本，不少業主都肯短租舖位幾個月。

有代理老友估計，依家市場上嘅短租放盤較舊年多咗大約5至8%，當中旺角砵蘭街近期已經連錄兩宗舖位短租成交，其中一個雙號地舖啱啱畀間民生用品店租咗，月租約7萬元，較長約租金平咗大約近五成。