Fundman睇市：領匯穩陣收息唔使憂

全球股市在十月份挾淡倉的氣勢，一踏入十一月即變得蕩然無存。道指前晚急跌276點，歐元兌美元急挫，股匯單邊升市有逆轉迹象，向好友開的第一槍，可能係「希臘長毛」呼籲國會及使慣歎慣的國民舉行公投，去決定希臘是否接受歐盟援助及按國基會要求削減開支。

自從希臘得高盛之助，搞靚盤數瞞天過海入咗歐盟俱樂部，國家發債成本由10厘降至唔夠3厘，官民享盡低融資成本的好處，養成洗腳唔抹腳惡習，二○一三年國債估計會相當於GDP的160%，遠高於歐盟的60%目標，即使國債「削髮」五成，在政府緊縮開支下，GDP肯定同步縮水，債務對GDP比例未必有大改善，不過姑勿論點，經濟唔好往往債仔惡過債主，借十蚊還五蚊都唔肯，再搞落去，只怕希臘最終都係得被歐盟踢出局一個結局。

G20峰會難寄望

希臘的骨牌效應，令歐債危機又再死灰復燃，意大利十年國債孳息升至6.17厘，比德國國債息1.85厘，息差創新高，可見債商正拋售「歐豬」債買入安全性較高的德債，向歐盟穩定金融市場措施（EFSF）投下不信任票。儘管市場仍期望G20峰會有解救方案，但史提芬勸看官仲係打定輸數較好。

昨日朝早，祖國公布十月製造業採購經理指數（PMI），按月回落0.8去到50.4，無論對比預測中值51.8，定係分析師預測範圍的50.7至52.2，都唔係理想數字。有趣的是，A股第一個反應係開低1%，之後倒升1%（收市打回原形），大致反映內地股民希望相對差的經濟數據出籠，會加速中央對緊縮措施作出修正。

港股跌494點，收報19,369點，成交672億元，沽空佔成交比例回升至9.3%，在十月份嚴重超買及歐股氣氛有逆轉的情況下，估計最低消費，恒指點都要試一試10日線支持19,006點。假如再數落去，跌番十月反彈4,102點的一半升幅，見18,221點都唔出奇。十月成功偷位博反彈的，不妨持盈保泰，等下一次機會來臨。

運動用品股教筆者不得不認衰，安踏（02020）一二年首兩個季度定單僅錄得「低單位數增長」，股價跌0.24元，報6.97元。年初至今，安踏股價累跌四成四，瑞信將目標價由6.8元降至6.1元，維持「跑輸大市」評級。經營上安踏比其他對手優秀，但其他品牌一兩折大賣場方式清舊貨，對行業帶來的負面影響，筆者確係過分低估。

好息之徒至愛的領匯（00823），消息指可能洽購麗港城商場，一旦成事，將會係上半年以11.7億元收購將軍澳南豐商場部分商用樓面後，第二次染指私人商場，擴大投資物業比重。分析員估計，麗港城商場及停車場估值22億元，等於領匯三月底時物業組合總值673億元的3.3%。

領匯本身可容許債務上限為45%，三月底時淨負債比率僅18.9%，意味未來有條件進行150億至170億元規模的收購，而連續的收購消息具積極意義，有利增加收入來源。面對市場風高浪急，唔想冒險，只求穩穩陣陣一年收4至5厘息，領匯絕對係首選。