股海實戰：體育用品股不宜沾手

歐債危機又再發作，意大利同西班牙債息齊升，再次觸動投資者神經，加上美國明富環球申請破產保護，令好友縮手，淡友乘勝追擊，結果尋日恒指插穿19,500點，低位見19,322點，收報19,369點，跌494點，成交672億元，大鱷屠熊論唔成立。執筆時歐股全線大飲茶，既然恒指落得番呢啲位，惟有以靜制動，唔爭在睇埋18,900至19,000點承接再算。

內地十月份PMI遜預期，本來應該可以視為沽售藉口，但官方有先見之明，率先發出「微調」言論，故見A股靠穩。之不過，溫總重申調控內房不放鬆，加上突然傳出大型房企萬科劈價推盤，珠海市周一晚又突然發緊急通知，成為首個執行「雙限令」（限制購房資格及限制商品房預售價格）嘅城市，內房股反撲無望，呢個時候入場博反彈，如同玩空手入白刃！

雨潤經營環境困難

尋日提到喺下周初CPI公布前可以留意雨潤（01068）表現，公司宣布第三季利潤同比下跌約25%，並預示第四季度經營環境依然困難，訊息與九月底嘅通告類似，尋日開市價12.78元已為全日低位，收報13.04元，跌幅5.6%，成交增加，且觀察今日股價能否保住尋日低位。

講到生意難做，舊年內地體育用品股股價紛紛見頂回落，行業進入調整期，相關股份往績市盈率由高峰期動輒二、三十倍，回落至僅得單位數字，可謂差天共地。面對行業形勢急轉直下，各大營運商紛紛着手調整銷售策略，李寧（02331）及中國動向（03818）均陣前易帥備戰，喺二、三線城市中佔優勢嘅安踏（02020）最近亦預計，一二年首兩季公司合計定單額僅錄得低單位數按年增長，故將一一年底嘅分店目標由8,200家微調至7,800至8,000家，一二年嘅目標尚有待確定。

難怪先前一眾投行如瑞信、高盛等，都先後大幅調低體育用品股嘅目標價及盈利預測，361度（01361）、中國動向、匹克（01968）股價先後創歷史新低，一線嘅李寧同安踏股價亦尚未止跌。

明年春節後再檢討

阿莊估計，未來半年各體育用品營運商仍須努力處理存貨，收入及利潤齊跌係在所難免。如今宜先觀察各營運商如何制訂明年嘅銷售及分店目標，亦不排除行業會有整合，情況跟內房板塊有點類似，分別在於內房調整由行政指令主導，體育用品股調整則由市場主導，亦因此也許後者嘅調整需時會較短，且留待明年春節過後再作檢討，此前撈底舉措則可免則免。