京士活復活了

二手樓市乍暖還寒，近月接連有地產代理行頂唔住「執笠」，但亦有人認為機不可失，係發圍好機會，其中剛於九月全線停業嘅「前」京士活（集團）地產，即將喺大圍「復活」，新老闆更會保留京士活牌頭，估計大圍兩間行將會請30至40人，日後仲有機會接收埋沙田其他分行發展。

樓市交投低處未算低，早前有地產代理行關門大吉，其中有至少5間分行嘅京士活（集團）地產更全線停業，但劉Sir收到可靠消息，話京士活大圍分行就嚟重開，即刻去大圍探過「虛實」。

點知劉Sir都未踏出大圍站，就見到「前」京士活對住港鐵站間分行已貼上「紅紙」，準備好重新「開張」；舖頭裏面仲有四、五個人喺度執緊嘢！於是就行過去了解吓京士活係咪就快「復活鳥」？

擇日重開 擬添兵40

其中有個員工就同劉Sir講，連埋呢間，大圍有兩間京士活「前」分行幾日後就會正式重開，預計到時會請30至40人，重開原因係新老闆睇好後市，遲啲更有機會接收埋沙田其他分行做，但當然要睇市況，而新舖會繼續保留「京士活」個牌頭，但後面可能加幾個字咁話。

其實市場早已「吹風」，上月起大圍京士活「前」分行已有人「坐舖」，故早有重開消息，另部分前京士活員工更將回巢助陣，於大圍重振聲威，打響頭炮。

而自從京士活九月全線停業，市場早已傳出被收購傳聞，但一直都係只聞樓梯響，部分員工更已「過檔」；其實地產代理行逆市擴軍不足為奇，如置業18早就表明會加人手，而世紀21奇豐就計劃擴大版圖，跨區發展。

代理睇好細盤後市

其實不少代理都睇好後市，好似主力新界東市場嘅世紀21奇豐物業，其主席及行政總裁李峻銘尋日話，住宅供應增加有限，料樓市穩步上揚，明年中小型樓樓價可升10%，豪宅樓價就會升20%；另外，祥益又話，反映屯門樓價嘅呎價領先指數按周升3.73%至219.42點，而過去周末交投亦增27%，相信細樓價後市樂觀。