股海實戰： 雨潤食品續有反彈空間

國務院總理溫家寶上周六「補飛」，強調要「堅定不移地搞好房地產調控」，免得大家對號入座，以為「微調」等於內房終可擺脫調控緊箍咒，故見尋日內房股立即發軟蹄，但睇中國海外（00688）、華潤置地（01109）及恒大（03333）僅跌半成多啲，跌幅尚算溫和。

恒指尋日早段高見20,155點後回落，失守兩萬點關，收報19,864點，跌154點，成交683億元。目前恒指100日線在20,369點，50日線支持則在18,907點。若然大鱷有心睇住班老散嚟做嘢，會唔會賣大包先插穿萬九點放生淡友至再挾上去，實乃疑問，但再推上又有咩理據，呢一刻仲未好清楚。

輪證交投繼續活躍

上周五恒指熊證街貨量急增，尋日見到牛熊證同窩輪佔大市成交比例又再次回升，至32.9%，一來係大市成交減少令基數降低，二來牛熊證及窩輪實際成交額亦有所回升，同創十月十九日以後最高單日成交額。十一月金魚缸可能又再「變天」，八、九月屠牛，十月屠熊，十一月係邊瓣，成為近日缸邊友嘅熱門話題。

見報推介嘅食品股旺旺（00151），尋日真係落過7元邊，見跌唔落，耐冇落場手痕痕，遂以平均價7.16元買入5萬股一試，收報7.28元，跌0.27%。

繼續聚焦食品股，雨潤食品（01068）股價由六月高位29元回落至九月廿六日低位7.45元，跌幅足達74%，股價創新低。當日公司發出通告交代業務營運表現，指預期第三季利潤同比減少，主要原因係受負面報道以及原材料（特別指生豬）成本大幅上升，並可能影響第四季業務，變相發「盈警」。壞消息出盡後股價觸底，之後反覆回升，昨日高位13.98元，較低位反彈約88%。

據內地生豬業數據顯示，截至上周四，全國出欄肉豬均價已連跌六周，回落至今年五月嘅水平，但由於飼料價格未有大變，料再大回幅度有限，年底前料趨於平穩，應有助改善肉食製造商嘅經營情況。

預期官方將於本月九日公布十月份CPI，於此前後不妨留意雨潤表現，短線企穩12至13元水平嘅話，以六月至九月高低位計，反彈跌幅嘅0.382阻力位喺15.6元，反彈跌幅嘅一半阻力位喺18.2元，與100日線18.37元相近，10日線支持喺12.2元。