「大款」睇淡掟貨唔手軟

去年年底額外印花稅出台後，唔單止對本地買家構成影響，連向來惜售嘅內地業主亦有出貨迹象，一份代理報告顯示，今年第三季內地個人名義持有單位沽貨宗數及總額，佔整體買賣比例3%及3.7%，雖按季稍回落，但劉Sir發現，原來自舊年第四季起，已連續四季維持喺3%或以上高位。

樓市旺場嗰陣，要內地客沽貨真係難過登天，但面對逆市，持貨力幾強都難免要屈服出貨，劉Sir參考代理行嘅一份數據發現，上一季內地個人買家沽樓宗數佔整體私宅買賣比例約3%，按季稍微回落約0.2個百分點，但已經係連續四個季度佔最少3%水平，屬於○七年初起有統計以來比例最高時期，足以反映已經有不少內地客沽貨套現。

豪客賤賣帝峯銀湖

至於涉及內地客沽售金額比例亦同步增加，連續四季達3.7%或以上高位，如果內地客都睇淡香港樓市，劉Sir認為樓價真係想唔跌都幾難。

事實上，近排內地業主真係多咗出貨，咁啱最近溫州民企又爆融資風暴，當地來港置業嘅投資客就梗係加快散貨啦，好似最近一名持有西南九龍帝峯．皇殿最少6伙內地客，上月劈價500萬元沽出其中一伙。又好似烏溪沙站銀湖．天峰更加有內地客劈價100萬元，蝕埋使費離場添。

入市專揀優質單位

不過，內地客出貨增加之餘，入市比例都有增長，始終內地客都鍾情香港優質單位，有關數據顯示，今年第三季內地買家佔整體成交及金額比例分別約12.5%及22.7%，按季增1同3個百分點，係○七年有統計以來新高。代理老友利嘉閣蔡銘軒話，奧運站海桃灣3座中層E室，由內地客以818萬元承接，呎價逾萬元。